Azərbaycan, Bakı, 17 noyabr / Trend , müxbir C.Babayeva/ Azərbaycan Kommunist Partiyasının (AKP) nümayəndələri Rusiya Kommunist Partiyasının XIII qurultayında iştirak edəcəklər.
AKP Rəyasət Heyətinin bazar günü keçirilən iclasında partiyanın Mərkəzi Komitəsinin sədri Rauf Qurbanov və partiyanın Moskvadakı daimi nümayəndəliyinin rəhbəri Loğman Kişiyevin qurultaydakı iştirakları təsdiq olunub.
Qurultay 29-30 noyabr tarixində Moskvada keçiriləcək.
Qurbanovun bazar ertəsi Trend -a bildirdiyinə görə, 2006-cı ildə Rusiya və Azərbaycanın kommunist partiyaları arasında əməkdaşlıq memorandumu imzalanıb və sədri olduğu partiya Rusiya kommunistlərinin bütün tədbirlərinə dəvət alır.
Trend -un arayışı: Azərbaycanda kommunist ideologiyasına əsaslanan partiya hələ "Böyük oktyabr sosialist inqilabı" adlanın çevrilişdən əvvəl, 1903-cü ildə yaradılıb. O vaxt "Hümmət" adlanan partiyanın liderləri məşhur dövlət xadimləri Məşədi Əzizbəyov, Nəriman Nərimanov və digərləri olub. SSRİ dağıldıqdan sonra müstəqillik dövründə Azərbaycan Kommunist Partiyasının fəaliyyətinə 1991-ci ildə xitam verilib, 1993-cü ildə bərpa olunub.
Solçu partiya olan AKP özünü iqtidara qarşı konstruktiv müxalifət hesab edir.
Məqalə müəllifi ilə əlaqə saxlamaq üçün ünvan: [email protected]