Azərbaycan, Bakı, 26 noyabr / Trend , müxbir C.Babayeva/ Azərbaycan Milli Demokrat Partiyası (AMDP) təşkilatın keçmiş sədri, sabiq daxili işlər naziri İsgəndər Həmidovun yenidən partiya sədrliyinə gətiriləcəyi barədə yayılan məlumatların həqiqətəuyğun olmadığını bildirir.
"İsgəndər Həmidovun yenidən partiya sədrliyinə gətiriləcəyi barədə mətbuatda yayılan informasiya qərəzli məqsəd daşıyır", - deyə AMDP sədri Tufan Kərimli çərşənbə günü Trend -a bildirib.
Trend -un arayışı: KİV-də Azərbaycan Milli Demokrat Partiyasının keçmiş sədri, sabiq daxili işlər naziri Həmidovun yenidən partiya sədrliyinə gətiriləcəyi barədə məlumat yayılıb.
Kərimlinin sözlərinə görə, mətbuatdakı məlumatlar partiyanı parçalamaq cəhdlərinin davamıdır. "Əvvəllər də partiyanın parçalanmasında, onu ələ keçirməkdə maraqlı qüvvələr olub. Bu günə qədər bu məqsədə çatmamış həmin qüvvələr partiya haqqında həqiqətəuyğun olmayan məlumatlar yayırlar", - deyə AMDP sədri bildirib.
Kərimli partiyada təşkilatlanma prosesinin getdiyini bildirib. "Bəzi rayon təşkilatlarının yenidən formalaşdırılması və bərpası, bəzilərinin isə yenidən qurulması prosesi gedir. Yaxın gələcəkdə partiyanın fəaliyyəti kifayət qədər nəzərəçarpacaq olacaq", - deyə partiya sədri bildirib.
Trend -un arayışı: AMDP 1993-cü ildə yaradılıb və ilk adı "Boz Qurd" olub. 1994-cü ildə Ədliyyə Nazirliyində dövlət qeydiyyatına alınıb. 1995-ci ildə Ali Məhkəmə partiyanın adının müvafiq olmadığını əsas gətirərək, "Boz Qurd"un dövlət qeydiyyatını ləğv edib. Partiya qeydiyyat problemini həll etmək üçün 1999-cu ildə keçirdiyi ikinci qurultayında adını dəyişib və Milli Demokrat Partiyası adlandırılıb. Lakin Ədliyyə Nazirliyi partiyanı qeydiyyata almaqdan imtina edir. Partiyanın keçmiş sədri, sabiq daxili işlər naziri Həmidov 1995-2004-cü illərdə həbsdə olub. 15 il azadlıqdan məhrum edilən Həmidov 2004-cü ildə prezidentin əfv fərmanı ilə azadlığa çıxıb.
Bu ilin aprelində Həmidov partiya sədrliyindən istefa verib. O, istefasını partiyada sədrliyə layiq şəxslərin olması və onlara yol açmaq istəməsi ilə izah edib. AMDP-nin növbədənkənar IV qurultayında Böyük Məclis sədri Kərimli partiyanın sədri seçilib.
Məqalə müəllifi ilə əlaqə saxlamaq üçün ünvan: [email protected]
