Azərbaycan, Bakı, 26 noyabr / Trend , müxbirlər D.İbrahimova, A.Namdari/ Birləşmiş Ştatlarla İran arasında münasibətlər heç vaxt Amerikada keçirilən seçkilərin nəticələrindən asılı olmayacaq, - İran parlamentində Mühafizəkarlar Partiyasının nümayəndəsi Fatimə Acerlu Trend -a deyib.
İki ölkə arasında münasibətlər "qurd və quzu" münasibətlərini xatırladır və onların yaxın gələcəkdə yaxşılaşacağına ümid yoxdur, - Acerlu hesab edir.
İkitərəfli münasibətlər yalnız o zaman yaxşılaşa bilər ki, ABŞ İslam Respublikasına münasibətdə siyasətini dəyişsin. Onun sözlərinə görə, İran hakimiyyəti bu dəyişikliyi alqışlayar.
İranın nüvə probleminin həllinə gəlincə, ABŞ "yanaşmasını və qaydaları dəyişməli və uranı zənginləşdirən ölkələrə qarşı ikili standartlardan imtina etməlidir", - Acerlu bildirib.
Keçmiş ABŞ senatoru Bennet Constonun fikrincə isə, ABŞ - la İran arasında danışıqların başlanğıcı üçün İslam Respublikası nüvə proqramının işləmələrini dayandırmalıdır.
"Nüvə proqramının işləmələrini dayandırılması iki dövlət arasında münasibətlərin yaxşılaşması istiqamətində səmərəli addım olacaq", - Luiziana ştatından olan keçmiş senator (1972 - 1996) Bennet Conston Trend - a telefonla deyib.
"İran Yaxın Şərqdə stabilliyin açarıdır", - Conston hesab edir.
Senatorun fikrincə, İslam Respublikası regionda əsas oyunçulardan biridir və ABŞ İranı Yaxın Şərqdə vacib problemlərin həllinə cəlb etməyə çalışır.
"Bu həm İranın, həm də ABŞ - ın maraqlarına uyğundur", - Conston deyib.
Müəlliflə əlaqə ünvanı: trend
