Azərbaycan, Bakı, 27 noyabr / Trend , müxbir A.Hüseynbala/ Azərbaycanın müxalif Ümid Partiyası 2009-cu ildə keçiriləcək bələdiyyə seçkilərinə hazırlığa start verib.
"Partiyanın sədri İqbal Ağazadə artıq Qəbələ, Oğuz, Kürdəmir, Samux, Ağdaş rayonlarında və Gəncə şəhərində partiyanın yerli təşkilatları ilə görüşərək bələdiyyə seçkisinə hazırlıqla bağlı tapşırıqlarını verib", - cümə axşamı Trend -a Ümid Partiyası sədrinin müavini Ənvər Ağayev bildirib.
Trend -ın arayışı: Azərbaycanda bələdiyyə seçkisi gələn il, parlament seçkisi 2010 - cu ildə keçiriləcək. İndiyədək iki dəfə - 1999 və 2004-cü ildə bələdiyyə seçkiləri keçirilib.
Onun sözlərinə görə, bələdiyyə seçkilərində kifayət qədər uğur əldə edəcəklərinə inanırlar: "Bizim bütün bələdiyyələr üzrə proqram layihəmiz var. Artıq Azərbaycandakı bütün bələdiyyələrin siyahısı, ərazisi, üzvlərinin və seçicilərin sayı müəyyənləşdirilib", - Ağayev vurğulayıb.
Sədr müavini deyib ki, Ümid Partiyası hər bələdiyyə üzvünün sayı qədər namizədlərini irəli sürəcək: "Məqsədimiz bütün bələdiyyədə partiya üzvlərimizin daha çox qalib gəlməsini təmin etməkdir. Seçkilərə blok şəkilində yox, təkbaşına qoşulacağıq" - Ağayev deyib.
Müxalifəti təmsil edən Ümid Pariyası 1993-cü ildə yaradılıb. 2002-ci ildə Vətəndaş Birliyi Partiyası (VBP) Ümid Pariyasına birləşib. VBP-nin sədri olmuş İqbal Ağazadə Ümid Partiyasına sədr seçilib. Ağazadə Milli Məclisin deputatıdır.
Məqalə müəllifi ilə əlaqə ünvanı: [email protected]
