Azərbaycan, Bakı, 04 dekabr / Trend , müxbir K.Zərbalıyeva/ Azərbaycan hakimiyyəti Seçki Məsəlləsinə yenidən əlavə və dəyişikliklərin edilməsi üçün Avropa Şurasının Venesiya Komissiyası ilə müzakirələrə başlayacaq.
"Seçki Məcəlləsinə əlavə və dəyişikliklərə baxılacaq və bu dəyişikliklər bələdiyyə seçkisi ilə bağlı olacaq", - cümə axşamı Trend -a Milli Məclis (parlament) Aparatının sədri Səfa Mirzəyev bildirib.
Trend -un arayışı: Avropa Şurasının Venesiya Komissiyasının (VK) katibi Cianni Bukikio bazar ertəsi Trend -a eksklüziv müsahibəsində komissiyanın Seçki Məcəlləsinin təkmilləşdirilməsində maraqlı olduğunu bildirmişdi.
"Seçki qanunvericiliyi kifayət qədər yaxşıdır. Onu daha da yaxşılaşdırmaq olar. Əgər Azərbaycan hakimiyyəti istərsə, Venesiya Komissiyası gələcəkdə Seçki Məcəlləsi üzərində yenidən işləməyə davam edə bilər", - Bukikio deyib.
Azərbaycan hökuməti ilə Avropa Şurası Venesiya Komissiyasının birgə müzakirələrindən sonra iyunun əvvəlində Seçki Məcəlləsinə əlavə və dəyişikliklər edilib. Dəyişikliklərdə Azərbaycan müxalifətinin istədiyi seçki komissiyalarının paritet əsasda formalaşdırılması məsələsi əksini tapmayıb.
Azərbaycanın bəzi müxalifət partiyaları seçki qanunvericiliyinə etiraz olaraq oktyabrın 15-də keçirilən prezident seçkisində iştirakdan imtina edib.
Mirzəyevin sözlərinə görə, bəzi deputatlar və mütəxəssislər hesab ediblər ki, bələdiyyə seçkisi ilə bağlı Məcəllədə təkmilləşməyə ehtiyac var.
"Bu dəyişikliklər bələdiyyə seçkilərində namizədlərin irəli sürülməsi, təşviqat müddəti, səsvermənin təşkil edilməsi ilə bağlı olacaq", - Mirzəyev əlavə edib.
Azərbaycanda bələdiyyə seçkisi 2009-cu ilin sonlarında keçiriləcək. Azərbaycanda 2757 bələdiyyə fəaliyyət göstərir. Onlardan 2400 -ü kənd bələdiyyəsidir.
Məqalə müəllifi ilə əlaqə ünvanı: [email protected]
