Azərbaycan, Bakı, 05 fevral / Trend , müxbir A. Hüseynbala/ Azərbaycanın bir qrup müxalif partiyasının referendumla bağlı təsis etdiyi təşviqat qrupu Konstitusiya Məhkəməsinə müraciət edib.
"Müraciətdə qeyd edilir ki, Milli Məclisin ötən il dekabrın 26-da qəbul etdiyi qərar Azərbaycan Konstitusiyasına, o cümlədən Konstitusiya ilə müdafiə olunan insan hüquq və azadlıqlarına zərbə vurduğundan referendum keçirilə bilməz", - cümə axşamı Trend -a "Qarabağ və Respublika Uğrunda Hərəkat"da təmsil olunan Azərbaycan Demokrat Partiyasının (ADP) sədri Sərdar Cəlaloğlu bildirib.
Trend -un arayışı: Martın 18-də Azərbaycanda Konstitusiyanın 29-cu maddəsinə əlavə və dəyişikliklərin edilməsi məsələsi üzrə referendum keçiriləcək.
Referendum üzrə 13 təşəbbüs qrupu imza vərəqələrini Mərkəzi Seçki Komissiyasına (MSK) təhvil verib.
Hakim Yeni Azərbaycan Partiyasının referendum üzrə "Yeni Azərbaycan", "Şəhər", "Tərəqqi" və "Hüquq və Demokratiya" təşəbbüs qrupları MSK-da təbliğat qrupları kimi qeydiyyata alınıblar. "Abad kənd" təşəbbüs qrupu qeydə alınmayıb.
Fevralın 1-də saat 18:00-da təşəbbüs qrupları tərəfindən imza vərəqlərinin MSK-ya təhvil verilməsi müddəti başa çatıb.
Azərbaycan Konstitusiyası 1995-ci ildə qəbul edilib, 2002-ci ildə Əsas Qanuna əlavə və dəyişikliklər edilib.
Cəlaloğlunun sözlərinə görə, toplantıda hərəkatın genişlənməsi ilə bağlı məsələ də müzakirə olunub: "Demokratiya Uğrunda İttifaqda (DUİ) təmsil olunan və Azərbaycan Milli İstiqlal Partiyasının (AMİP) təsis etdikləri "Azərbaycan Xalq Cümhuriyyəti" və "Milli İstiqlal" təşviqat qrupları bizim hərəkata qoşulmaqla bağlı müraciətlərimizi rədd ediblər. Düşünürəm ki, onların bir yerdə olmağın qeyri-mümkünlüyü ilə bağlı gətirdikləri arqumentlərin heç bir əsası yoxdur", - ADP sədri əlavə edib.
Müxalif partiya sədri deyib ki, hər iki siyasi qurumun "Qarabağ və Respublika Uğrunda Hərəkat"a qoşulması üçün özü şəxsən təşəbbüs göstərib: "Mən həm Mirmahmud Mirəlioğlu və Pənah Hüseynlə görüşüb, hərəkatda təmsil olunmalarını təklif etmişəm. Sonradan Sülh və Demokratiya İnstitutunun rəhbəri yazılı şəkildə onlara müraciət edib. Onların indi sadaladıqları arqumentlər bəhanədir", - Cəlaloğlu vurğulayıb.
Onun sözlərinə görə, DUİ-nin və AMİP-in müxalifətin birgə hərəkatını yaratmaqdan imtina etməsinə heç bir əsas yoxdur.
Sаğ təmаyüllü partiya olan ADP 1991-ci ildə Sərdar Cəlaloğlu tərəfindən təsis edilib. Partiya 2007-ci ilin yanvarınadək iqtidara qarşı radikal müxalif mövqedə olub. 2008-ci ilin yanvarında ADP-nin hakimiyyətlə dialoq qurulması ilə bağlı yeni siyasi kursu qəbul edilib. Buna etiraz olaraq keçmiş sədr Rəsul Quliyev və tərəfdarları ADP-dən imtina edərək özlərinin Açıq Cəmiyyət Partiyasını yaradıblar.
Məqalə müəllifi ilə əlaqə ünvanı:[email protected]
