Azərbaycan, Bakı, 11 fevral / Trend , müxbir C.Babayeva/ Avropa Şurası (AŞ) martda referenduma çıxarılacaq Azərbaycan Konstitusiyasına bəzi düzəlişlərdən narahatdır.
"Bəzi düzəlişlər kütləvi informasiya vasitələrinin azadlığını daha da məhdudlaşdıra bilər. Şəxsi həyatın müdafiəsi barədə təklif olunan müddəa olduqca genişdir və elə şəkildə istifadə oluna bilər ki, bu, İnsan haqları üzrə Avropa konvensiyasına zidd ola bilər", - deyə Avropa Şurası Baş katibi Terri Devisin bəyanatında bildirilir.
Azərbaycanda martın 18-də Konstitusiyanın 29-cu maddəsinə əlavə və dəyişikliklərin tətbiq edilməsi məsələsi üzrə referendum keçiriləcək.
"Yeni Azərbaycan", "Şəhər" və "Tərəqqi", "Hüquq və demokratiya" və "Vətəndaş cəmiyyəti", "Davamlı inkişaf naminə" və "Zəka" referendum üzrə təşəbbüs qrupları Mərkəzi Seçki Komissiyasında (MSK) təşviqat qrupları kimi qeydiyyatdan keçiblər. "Abad kənd" və "Azad söz" təşəbbüs qrupları qeydiyyatdan keçməyib.
Azərbaycan Konstitusiyası 1995-ci ildə qəbul olunub, 2002-ci ildə Əsas qanuna əlavə və dəyişikliklər edilib.
Avropa Şurası fikir azadlığı nəzərə alınmaqla şəxsi həyatda vətəndaş hüquqlarının müdafiəsinin hansı formada balanslaşdırılmış ola biləcyi barədə tövsiyyələr verməyə hazırdır. "Avropa Şurası yalnız məsləhət verir, əgər üzv dövlət bunu xahiş edərsə", - deyə AŞ Baş katibinin çərşənbə günü yayılan bəyanatında bildirilir.
Bəyanatda həəmçinin bildirilir ki, Avropa Şurası həbsdə olan jurnalistlərin sayından narahatdır və ölkə hökumətini bu məsələni təcili olaraq yenidən baxmağa çağırır.
Azərbaycanda müxtəlif müddətlərə azadlıqdan məhrum edilən jurnalistlər: "Azadlıq" qəzetinin baş redaktoru Qənimət Zahid (5 il müddətinə), eyni qəzetin əməkdaşı Mirzə Sakit (3 il müddətinə) və "Gündəlik Azərbaycan" və "Realnıy Azerbaydjan" qəzetlərinin baş redaktoru (8 il 6 ay müddətinə) və "Bizim Yol" qəzetinin redaktoru Müşviq Hüseynov (5 il müddətinə).
Azərbaycan Prezidentin İcra Apparatının rəhbəri Ramiz Mehdiyev çərşənbə axşamı jurnalstlərə bildirib ki, Azərbaycanda söz və mətbuat azadlığı mövcuddur. "Azərbaycanda həbs edilən jurnalistlər konkret cinayətlər törədiblər və bu cinayətlərə görə məsuliyyətə cəlb ediliblər", - deyə o bildirib.
Mehdiyevin sözlərinə görə, jurnalistlər peşəkar fəaliyyətlərinə görə həbs olunmayıblar.
Məqalə müəllifi ilə əlaqə ünvanı - [email protected]
