Qazaxstan, Alma-ata, 12 fevral / Trend , müxbir R.Məşədihəsənli/ Dünya Ahıska Türkləri Birliyi rəsmən fəaliyyətə başladı. Bu fikirləri cümə axşamı Dünya Ahıska Türkləri Birliyinin prezidenti, Qazaxıstan Ahıska Türkləri Milli Mərkəzinin rəhbəri Ziyaəddin İsmixan-oğlu Trend müxbirinə bildirib.
İsmixan-oğlunun sözlərinə görə, keçən ilin iyununda Ankarada dünyanın 9 ölkəsində - Türkiyə, Azərbaycan, Qazaxıstan, Rusiya, Qırğızıstan, Ukrayna, ABŞ və sair respublikalarda məskunlaşan ahıska türkləri liderlərinin iştirakilə keçirilən toplantıda Dünya Ahıska Türkləri Konqresinin yaradılması haqqında qərar qəbul olunmuşdu.
Sonrakı görüş və toplantılarda təşkilatın adının dəyişdirilərək rəsmən Dünya Ahıska Türkləri Birliyi kimi fəaliyyət göstərilməsinə qərar verildi.
"İki gün öncə İstanbulda keçirilən yığıncaqda Birliyin Nizamnamə və sənədləri təkrarən imzalanaraq Türkiyə hökumətinə təqdim olundu və ötən gün rəsmi olaraq Dünya Ahıska Türkləri Birliyinin adı bəyan edildi", - deyə İsmixan-oğlu bildirib.
Ahıska Türklərinin lideri Azərbaycanda məskunlaşan və Gürcüstandakı ata-baba yurdlarına dönmək istəyən ahıska türklərinə hərtərəfli dəstəyə görə millət vəkili Qənirə Paşayevaya dərin təşəkkürlərini çatdırıb və yaxın günlərdə onunla görüşərək ahıska türklərinin bölgədə yaranmış çətinliklərini birlikdə müzakirə etmək niyyətində olduğunu da dilə gətirib.
Müəlliflə əlaqə saxlamaq üçün elektron ünvan: [email protected]
