Azərbaycan, Bakı, 20 fevral / Trend , müxbir A.Hüseynbala/ Azərbaycanın müxalif partiyalarının referendumla bağlı təsis etdiyi təşviqat qruplarının təklif etdikləri yerlərdə mitinq keçirməsinə razılıq verilməyib.
"Bakı Şəhər İcra Hakimiyyəti bizə aksiyanı Bibiheybətdə keçirməyi təklif edir", - cümə günü Trend -a "Qarabağ və Respublika Uğrunda Hərəkat"da təmsil olunan Vətəndaş və İnkişaf Partiyasının (VİP) sədri Əli Əliyev bildirib.
Тrend Nеws-un arayışı: Azərbaycanda referendumla bağlı təsis edilən təşviqat qrupları fevralın 18-dən etibarən təbliğat kampaniyasına start veriblər.
Mərkəzi Seçki Komissiyasının qərarı ilə həftə ərzində bir dəfə 90 dəqiqə İctimai Televiziyada, 90 dəqiqə isə İctimai Radioda efir vaxtı müəyyənləşdirilib.
Televiziyada efir vaxtı saat 18:15-dən, radioda isə saat 20:15-dən başlayacaq.
Təşviqat kampaniyası zamanı bütün təşviqat qrupları üçün həm televiziyada, həm də radioda dörd dəfə pulsuz efir vaxtə ayrılacaq.
Referendumla bağlı qəbul olunmuş təqvim planına əsasən, təbliğat kampaniyası martın 16-da saat 24:00-da başa çatdırılmalıdır.
Martın 18-də Azərbaycanda ölkə Konstitusiyasına əlavə və dəyişikliklərin edilməsi üzrə referendum keçiriləcək.
Referendum üzrə "Yeni Azərbaycan", "Şəhər", "Tərəqqi", "Hüquq və demokratiya", "Vətəndaş Cəmiyyəti", "Davamlı İnkişaf Naminə", "Zəka", "Qarabağ və Respublika Uğrunda Hərəkat" və "Respublikaçılar" təşəbbüs qrupları MSK-da təşviqat qrupları kimi qeydiyyata alınıblar. "Abad kənd", "Azad söz", "Azərbaycan Xalq Cümhuriyyəti" və "Milli İstiqlal" təşəbbüs qrupları qeydiyyatdan keçməyib.
Azərbaycan Konstitusiyası 1995-ci ildə qəbul olunub, 2002-ci ildə Əsas Qanuna dəyişikliklər edilib.
Əliyevin sözlərinə görə, mitinqin hökumətin təklif etdiyi yerdə keçirilib-keçirilməyəcəyi haqda qərar təşviqat qruplarında təmsil olunan partiyaların nümayəndələri tərəfindən fevralın 21-də aparılacaq müzakirələr nəticəsində veriləcək. "Biz sabah həm də özümüzün nəzərdə tutduğumuz yerlərdə icazəsiz aksiya keçirib-keçirməməyimizi də müəyyənləşdirəcəyik", - müxalif partiya sədri əlavə edib.
"Qarabağ və Respublika Uğrunda Hərəkat"ı Azərbaycan Xalq Cəbhəsi, Vətəndaş və İnkişaf, Liberal, Demokrat, Müsavat və Ümid partiyaları, eləcə də bir neçə ictimai təşkilat təsis edib. Hərəkatda təmsil olunan siyasi və ictimai qurumlar fevralın 22-də saat 16-dan 18:00-dək ilk etiraz mitinqini keçirmək üçün yer ayrılması üçün Bakı Şəhər İcra Hakimiyyətinə xəbərdarlıq məktubu göndərib. Məktubda 5 yerdən birində - "Nərimanov" kinoteatrının qarşısındakı meydan, Məşədi Əzizbəyov heykəlinin önü, Hüseyn Cavid meydanı, Səməd Vurğun bağı və ya Prezident Aparatının 200 metr radiusunda hər hansı yerdə mitinqə şərait yaradılması istənilirdi.
Məqalə müəllifi ilə əlaqə ünvanı:[email protected]
