Azərbaycan, Bakı, 27 fevral / Trend , müxbir A.Hüseynbala / Azərbaycanın müxalifətçi lideri siyasi partiyaların referendumdan sonrakı əməkdaşlığının səmimi niyyətlərdən asılı olduğunu bildirib.
"Müxalifətin birliyi üçün əməkdaşlıq tamamilə saf niyyətlər ətrafında aparılmalıdır", - cümə günü Trend -a Milli Birlik Hərəkatının (MBH) lideri Lalə Şövkət bildirib.
Тrend Nеws-un arayışı: Azərbaycanda referendumla bağlı təsis edilən təşviqat qrupları fevralın 18-dən etibarən təbliğat kampaniyasına start veriblər. Referendumla bağlı qəbul olunmuş təqvim planına əsasən, təbliğat kampaniyası martın 16-da saat 24:00-da başa çatdırılmalıdır.
Martın 18-də Azərbaycanda ölkə Konstitusiyasına əlavə və dəyişikliklərin edilməsi üzrə referendum keçiriləcək. Azərbaycan Konstitusiyası 1995-ci ildə qəbul olunub, 2002-ci ildə Əsas Qanuna dəyişikliklər edilib.
Lalə Şövkətin fikrincə, referendumdan sonra müxalif qüvvələr konkret bir məqsəd naminə bir yerə yığıla bilərlər.
"Burada təmsil olunan insanların bir-birinə qarşılıqlı münasibəti səmimi olmalıdır. Liderlərin prinsipiallığı da bir yerdə mübarizə aparmaq üçün çox önəmlidir", - MBH lideri əlavə edib.
Onun sözlərinə görə, demokratiya uğrunda mübarizə aparan insanların kəmiyyəti deyil, insani keyfiyyətləri daha əhəmiyyətli rol oynayır. "Sözsüz ki, mən referendumdan sonra da əməkdaşlığın tərəfdarıyam. Referendumdan sonrakı əməkdaşlığın hansı formada olacağını zaman göstərəcək", - Lalə Şövkət qeyd edib.
"Azərbaycan müxalifətinin referendumdan sonra hansısa ciddi birliyinin yaranacağına inanmıram", - cümə günü Trend -a politoloq Zərdüşt Əlizadə bildirib.
Onun fikrincə, əvvəlki təcrübəyə əsaslanaraq demək olar ki, müxalif qüvvələr yenə birləşə bilməyəcəklər.
"Müxalifətin indiki birliyi də müvəqqəti xarakterlidir. Orada təmsil olunan partiya liderlərinin əksəriyyəti şəxsi ambisiyalarından vaz keçməyi bacarmırlar. Belə vəziyyətdə heç bir birlikdən söhbət gedə bilməz", - politoloq vurğulayıb.
Məqalə müəllifi ilə əlaqə ünvanı:[email protected]