Türkmənistan, Aşqbad, 16 mart / Tend News, müxbir H.Həsənov /
24-25 mart 2009-cu ildə Moskvaya səfərindən əvvəl Türkmənistan prezidenti Qurbanqulı Berdimuhammedov Rusiya ilə tərəfdaşlığın "strateji xarakter" daşıdığını qeyd edib.
"Türkmənistanla Rusiyanın əməkdaşlığı və tərəflərin bu əməkdaşlığın böyük potensialının realizəsinə ümumi yanaşması strateji xarakter daşıyır", - Berdimuhammedovun Nazirlər Kabinetində səsləndirdiyi fikirlərdən "Altın Asır" telekanalı sitat gətirib.
Rusiya son illər Türkmənistanın, ixrac qaznının əsas hissəsini alan ənənəvi tərəfdaşıdır. Hazırda Rusiyanın Qazprom ASC-nin Mərkəzi Asiya bazarındakı mövqeyini daha da gücləndirəcək Qazaxıstandan dəniz sahili ilə Xəzəryanı qaz kəmərinin tikintisinə başlanılıb. İndiyə qədər qaz tədarükü Özbəkistan və Qazaxıstandan keçərək "Orta Asiya-Mərkəz" qaz kəməri sistemi ilə həyata keçirilirdi.
Berdimuhammedov ölkələrarası əlaqələrin davamlı inkişafı və möhkəmləndirilməsi kontekstində Rusiya Federasiyasına qarşıdakı dövlət səfərinin əhəmiyyətini qeyd edib. Bu səfər çərçivəsində həmçinin Türkmənistan-Rusiya biznes-forumu və türkmən malları - toxuculuq, xalça və zərgərlik məmulatlarının sərgi-yarmarkası baş tutacaq.
"Biz həmişə qonşularımızla yaxşı və sıx münasibətlərimizi saxlayacağıq. Onların sırasına Rusiya da aiddir", - Berdimuhammedov bildirib.
Məqalə müəllifi ilə əlaqə ünvanı: [email protected]
