Azərbaycan, Bakı, 06 aprel / Trend , müxbir V.Javoronkova /
Avropa İttifaqının (Aİ) Cənubi Qafqaz üzrə xüsusi nümayəndəsi hesab edir ki, "Şərq tərəfdaşlığı" proqramı Cənubi Qafqaz ölkələri arasındakı bəzi fikir ayrılıqlarını aradan qaldırmaqda yardımçı ola bilər.
"Aİ-nin proqramı Azərbaycana və proqrama üzv olan digər ölkələr üçün çox önəmlidir və proqram iştirakçısı olan ölkələr arasında daha sıx əlaqələrin qurulmasında yardımçı ola bilər", - Bakıya səfərinin yekununda bazar ertəsi Aİ-nin Cənubi Qafqaz üzrə xüsusi nümayəndəsi Piter Semnebi bildirib.
"Şərq tərəfdaşlığı" - qonşuluq siyasəti çərçivəsidə Aİ ölkələrinin postsovet məkanı ölkələri ilə əlaqələrin yaxşılaşdırılmasına yönəlmiş Polşa-İsveç təşəbbüsüdür. Proqram martın 20-də Aİ-nin iclasında təsdiq edilib. "Şərq tərəfdaşlığı"nın təsis sammiti mayın 7-də keçiriləcək. "Şərq tərəfdaşlığı" proqramı Avropa İttifaqının 6 qonşu ölkəsini əhatə etməlidir: Azərbaycan, Gürcüstan, Ermənistan, Moldova, Ukrayna və Belarus. Proqram çərçivəsində Aİ qonşu ölkələrə 2009-2013-cü illər arasında 600 milyon avro vəsait ayıracaq.
"Proqramın məqsədi adıçəkilən ölkələrin Qərblə sıx əlaqəsini təmin etməkdən başqa layihəyə üzv-ölkələrin öz aralarında da isti münasibətlərin qurulmasına nail olmaqdır", - Semnebi qeyd edib.
Semnebiyə görə, proqram çərçivəsində əməkdaşlığın vacib məqamlarından biri də üzv-ölkələrlə Aİ arasında viza rejiminin sadələşdirilməsidir.
"Bu çox vacib məsələdir və Azərbaycan Prezidentinin Brüsselə planlaşdırılan səfəri zamanı bunu müzakirə etmək istərdik", - Semnebi deyib.
Məqalə müəllifi ilə əlaqə ünvanı: [email protected]