Azərbaycan, Bаkı, 20 may / Trend , müxbir A.Hüseynbala /
Azərbaycanın müxalif partiyası dövlət büdcəsindən maliyyə ayrılmadan əvvəl bəzi partiyaların fəaliyyətinin dayandırılmasını təklif edir.
"Büdcədən maliyyə ayrılarsa, partiyaların sayının çox olması səbəbindən ədalətsiz bölgü aparılacaq. Buna görə seçkilərdə iştirak etməyən, ölkənin ictimai-siyasi proseslərinə qatılmayan və təsir göstərməyən siyasi təşkilatlar bağlanmalıdır", - çərşənbə günü Trend -a Azərbaycan Milli İstiqlal Partiyasının (AMİP) mətbuat və informasiya katibi Əli Orucov bildirib.
Trend -un arayışı: Azərbaycanda 52 partiya Ədliyyə Nazirliyində dövlət qeydiyyatına alınıb. "Siyasi partiyalar haqqında" Qanun 1992-ci ildə qəbul olunub. Ciddi dəyişikliklərdən sonra yenidən qəbul olunacaq qanunda partiyaların dövlət büdcəsindən maliyyələşdirilməsi də nəzərdə tutulub.
Daha öncə Prezident Adminstrasiyasının İctimai-siyasi şöbəsinin müdiri Əli Həsənov Trend -a bildirib ki, bu məsələ həm Milli Məclis, həm də cəmiyyətdə müzakirə olunmalıdır. Onun fikrincə, məsələnin parlamentdə müzakirəsi zamanı ən adekvat və optimal variantlar seçiləcək və bu zaman müasir dünyanın tələbləri nəzərə alınacaq.
Həsənov bildirib ki, dövlət büdcəsindən maliyyələşmə zamanı siyasi partiyaların xarakteri, inkişaf maraqları da nəzərə alınacaq.
Azərbaycanın hakim partiyası da seçkilərdə iştirak edən siyası və yaxud parlamentdə təmsil olunan partiyaların dövlət büdcəsindən maliyyələşdirilməsinin tərəfdarıdır. Müxalifəti təmsil edən siyasətçilər qeydiyyatdan keçən partiyalara dövlət büdcəsindən maliyyə ayrılmasını təklif edir.
Orucovun sözlərinə görə, Ədliyyə Nazirliyində qeydiyyatdan keçən 50-dən çoz partiyanın indi yalnız 15-ə qədəri fəaliyyət göstərir. "Düşünürəm ki, qalan partiyalar ya ölkənin ictimai-siyasi həyatına təsir edən siyasi təşkilatlarla birləşməli, ya da birdəfəlik bağlanmalıdır", - partiya funksioneri əlavə edib.
Onun fikrincə, partiyalar könüllü olaraq fəaliyyətlərini dayandırmasalar, hökumət inzibati üsullarla problemi həll etməlidir. "Həmin partiyaların mövcudluğu ölkədə ədalətli rəqabət aparılmasına da imkan vermir. Digər tərəfdən, partiyaların sayının çox olması demokratiya imitasiyası yaradır. Bəzi partiyaların yalnız sədrlərindən başqa üzvləri olmadığından kənar təsirlər altına tez düşürlər", - Orucov vurğulayıb.
АMİP 1992-ci ildə yаrаdılаn və Аzərbаycаndа ilk dövlət qеydiyyаtınа аlınаn pаrtiyаdır. Etibar Məmmədov 2004-cü ilin sonunda partiyanın sədrliyindən istefa verdikdən sonra partiya daxilində parçalanma baş verib. Ondan sonra AMİP-in sədri olan Əli Əliyevə qarşı partiya daxilində narazılıq yarandığı zaman partiya üzvlərinin bir qismi AMİP-dən gediblər
Еtibаr Məmmədоv hаzırdа Bеynəlxаlq Dеmоkrаt İttifаqının (BDİ) sədridir.
Məqalə müəllifi ilə əlaqə ünvanı:[email protected]