Azərbaycan, Bаkı, 21 may / Trend , müxbir A.Hüseynbala /
Azərbaycanın müxalif partiyasının lideri təmsil olunduğu hərəkatın bələdiyyə seçkilərində ümumi siyahı ilə iştirakını təklif edir.
"Ümumiyyətlə, bu seçkidə iştirak üçün üç variantdan biri seçilməlidir. Düşünürəm ki, bizim uğur qazanmağız üçün ən məqbul variant vahid siyahının müəyyənləşdirilməsidir", - cümə axşamı Trend -a Milli Birlik Hərəkatının lideri və Azərbaycan Liberal Partiyasının (ALP) qurucusu Lalə Şövkət bildirib.
Trend -un arayışı: Azərbaycanda bələdiyyə seçkisi 2009-cu ilin sonunda, parlament seçkisi isə 2010-cu ilin payızında keçirilməlidir. Bundan əvvəl iki dəfə - 1999 və 2004-cü illərdə yerli özünüidarəetmə orqanlarına seçkilər keçirilib.
Hərəkat liderinin sözlərinə görə, bir neçə dəfə müzakirələr aparılsa da, "Qarabağ və Respublika Uğrunda Hərəkat"da təmsil olunan partiyalar yekun qərar qəbul etməyiblər. "Hər bir partiyanın da öz namizədlərini irəli sürüb seçkilərdə təkbaşına iştirakı istisna deyil. Digər variantda hərəkatda təmsil olunan bütün partiyaların seçkiyə ayrı-ayrılıqda qatılıb birgə əməkdaşlıq etməsi mümkündür. Amma mən ümumi siyahını müəyyənləşdirib seçkilərdə iştirak etməyin tərəfdarıyam", - Lalə Şövkət əlavə edib.
Onun sözlərinə görə, bələdiyyə üzvlüyünə namizədlərin vahid siyahısının müəyyənləşdirilməsi baş tutmasa belə, hər bir partiyanın ayrı-ayrılıqda seçkilərə getməsi, bütün namizədlərin hərəkatı ("Qarabağ və Respublika Uğrunda Hərəkat") ümumi müdafiə etməsi mümkündür. "Müzakirələr başa çatmadığından qəti söz deyə bilmərəm. Fikrimcə, referendumla bağlı bizim baş tutan əməkdaşlığımız yenə davam edəcək", - hərəkat lideri vurğulayıb.
"Qarabağ və Respublika Uğrunda Hərəkat"ı Azərbaycan Xalq Cəbhəsi, Vətəndaş və İnkişaf, Liberal, Demokrat, Müsavat və Ümid partiyaları, eləcə də bir neçə ictimai təşkilat təsis edib.
ALP sabiq dövlət katibi Lalə Şövkətin rəhbərliyi ilə 1996-cı ildə yaradılıb. Lalə Şövkət hazırda müxalifəti təmsil edən "Azadlıq" siyasi blokunun həmtəsisçisi və həmsədridir. O, müxalifətçi Liberal Partiyasının da qurucusu və lideridir.
Məqalə müəllifi ilə əlaqə ünvanı:[email protected]
