Azərbaycan, Bakı, 03 iyun / Trend , müxbir C.Babayeva /
Azərbaycan Milli İstiqlal Partiyası (AMİP) müxalifət partiyalarının bələdiyyə seçkisində təkbaşına uğur qazanacağını qeyri-mümkün hesab edir.
"Müxalifət partiyalarının təkbaşına uğur qazanması üçün kifayət qədər resursları yoxdur. Seçkidə müxalifət partiyalarının mütəşəkkil formada iştirakına ehtiyac var", - çərşənbə günü Trend -a AMİP-in mətbuat və təbliğat katibi Əli Orucov bildirib.
Trend -un arayışı: Azərbaycanda bələdiyyə seçkisinin bu ilin dekabrında keçirilməsi nəzərdə tututlur. Hazırda ölkədə 2757 bələdiyyə fəaliyyət göstərir. Bələdiyyələrin birləşməsindən sonra onların sayının 1766-ya enməsi gözlənir.
Orucov hesab edir ki, bələdiyyə seçkisi öncəsi müxalifətin forumunun keçirilməsinə ehtiyac var. "Müxalifət partiyalarının ümumi maraqları olduğu halda, forum keçirilməsi təşəbbüsü qısqanclıqla qarşılanmamalıdır. Forumun keçirilməsi ilə bağlı iki müxalifət birliyi arasında bələdiyyə seçkisi öncəsi qarşıdurmanın nəticəsi pis olacaq. Müxalifət düşərgəsində qarşılıqlı ittihamlara son qoymağa çağırırıq", - AMİP rəsmisi deyib.
Onun fikrincə, bələdiyyə seçkisində müxalifətin mütəşəkkiliyi parlament seçkiləri üçün start ola bilər.
Bələdiyyə seçkisi ilə bağlı AMİP-in bir sıra partiyalarla danışıqlar apardığına gəlincə, Orucov bildirib ki, müzakirələrə fasilə verilib. "Danışıqlara maraq göstərən partiyaların bələdiyyə seçkisi ilə bağlı yekun qərarları yoxdur. Danışıqlar bələdiyyə seçkisi öncəsi bərpa etdiriləcək", - o deyib.
Trend -un arayışı: АMİP 1992-ci ildə yаrаdılаn və Аzərbаycаndа ilk dövlət qеydiyyаtınа аlınаn pаrtiyаdır. Etibar Məmmədov 2004-cü ilin sonunda partiyanın sədrliyindən istefa verdikdən sonra partiya daxilində parçalanma baş verib. Ondan sonra AMİP-in sədri olan Əli Əliyevə qarşı partiya daxilində narazılıq yarandığı zaman partiya üzvlərinin bir qismi AMİP-dən gediblər. Məmmədоv hаzırdа Bеynəlxаlq Dеmоkrаt İttifаqının (BDİ) sədr müаvinidir.
Məqalə müəllifi ilə əlaqə ünvanı: [email protected]
