Azərbaycan, Bakı, 23 iyun / Trend , müxbir A.Hüseynbala /
Azərbaycan Müdafiə Nazirliyi həqiqi hərbi xidmət müddətinin uzadılması ilə bağlı məsələnin gündəmdə olmadığını deyib.
"Bu məsələnin müzakirəsi gündəmdə deyil", - çərşənbə axşamı Trend -a nazirliyin mətbuat xidməti rəisinin müavini Teymur Abdullayev bildirib.
Bəzi kütləvi informasiya vasitələrində həqiqi hərbi xidmətin 1,5-2 il müddətinə artırılacağı barədə məlumatlar yer alıb. Mövcud qanunvericiliyə görə isə ali təhsil almış əsgərlər 1 il, zabitlər isə 1,5 il müddətinə həqiqi hərbi xidməti keçirlər.
"Müdafiə Nazirliyində hər hansı layihənin hazırlanması haqda deyilənlərin heç bir əsası yöxdur", - çərşənbə axşamı Trend -a Milli Məclisin Müdafiə və təhlükəsizlik məsələləri komitəsinin üzvü Zahid Oruc bildirib.
Orucun sözlərinə görə, Müdafiə Nazirliyinin rəhbərliyi ilə söhbətlərində də onlar həqiqi hərbi xidmət müddətinin uzadılması haqda ümumiyyətlə düşünmədiklərini deyiblər.
"Hər bir halda istənilən sənədi qanunvericilik təşəbbüsü qaydasında Prezident imzalamalıdır. Mənim bildiyimə görə, Prezident Administrasiyasında da bununla bağlı heç bir hazırlıq getmir", - millət vəkili vurğulayıb.
Oruc deyib ki, onun üzvü olduğu komitədə və parlamentin müvafiq şöbəsində də həqiqi hərbi xidmətin müddəti ilə bağlı hər hansı layihə hazırlanmır. "Ona görə tam əminliklə söyləyə bilərəm ki, həqiqi hərbi xidmət müddətinin uzadılacağı ilə bağlı məlumatların heç bir əsası yoxdur", - komitə üzvü qeyd edib.
Məqalə müəllifi ilə əlaqə ünvanı: [email protected]