Azərbaycan, Bakı, 17 avqust / Trend , müxbir C.Babayeva /
Azərbaycan Demokrat Sol Partiyası (ADSP) və Xalq Sosialist Partiyası bələdiyyə seçkisi ərəfəsində birləşmək niyyətindədirlər.
"Partiyaların birləşməsi ilə bağlı danışıqlar aparılır. Böyük ehtimalla bələdiyyə seçkisi öncəsi iki partiyanın birləşməsi ilə bağlı siyasi qərar qəbul ediləcək", - bazar ertəsi Trend -a ADSP sədri Elşən Manafov bildirib.
Onun sözlərinə görə, ölkədə solçu partiyaların fəaliyyətlərinin əlaqələndirilməsinə böyük ehtiyac var. "Azərbaycanda həm sağ, həm sol, həm də mərkəz cinahda fəaliyyət göstərən partiyaların fəaliyyətlərinin koordinasiya edilməsi və qüvvələrin bir istiqamətdə yönəlməsinə böyük ehtiyac var. Sosialist partiyaların vahid ad altında fəaliyyəti həm maliyyə imkanları, həm də siyasi resursları genişləndirə bilər. Pərakəndə şəkildə fəaliyyət isə gündəmdə olan partiyalara heç bir siyasi dividend gətirmir. Azərbaycanda siyasi müxalifətin siyasi proseslərə təsir imkanı demək olar ki, yox dərəcəsindədir", - ADSP sədri deyib.
Trend -un arayışı: Bu ilin aprelində Azərbaycan Xalq Sosialist Partiyası (AXSP) və Azərbaycan Mütərəqqi Sosialist Partiyası (AMSP) birləşib. Birləşmədən sonra AMSP sədri Rüstəm Şahsuvarov AXSP sədrinin ictimai əlaqələr üzrə müavini vəzifəsini tutub. AXSP ötən ilin oktyabrında təsis edilib, sədri Rövşən Hüseynovdur.
Manafov, AXSP-nin rəhbərlik etdiyi partiyadan fərqli olaraq təsis qurultayını keçirib müəyyən sənədlərini Ədliyyə Nazirliyinə təqdim etdiyini bildirib. "Bizdən fərqli olaraq onlar qeydiyyata alınmaq ərəfəsindədirlər. Qeydiyyatla bağlı məsələ uğurla nəticələnərsə, təbii ki, birləşmə istiqamətində danışıqlar davam etdiriləcək. Hər iki partiyaya rəhbərlik edən şəxslərin birləşmədən sonra hansı vəzifələri tutacaqları ilə bağlı ciddi polemika aparılmalıdır", - Manafov deyib.
Trend -un arayışı: Elşən Manafov Azərbaycan Sosial Demokrat Partiyası sədrinin ideoloji məsələlər üzrə katibi və Mərkəzi Komitənin büro üzvü olub. Ötən ilin sentyabrında partiyanın həmsədri Araz Əlizadəni qurumu idarə edə bilməməkdə ittiham edən Manafov partiyadan xaric olunub. Bundan sonra o, öz tərəfdarları ilə yeni Demokrat Sol Partiyası yaratmaq barədə qərar verib.
Məqalə müəllifi ilə əlaqə ünvanı: [email protected]
