Azərbaycan, Bakı, 01 oktyabr / Trend , müxbir A.Hüseynbala/
Azərbaycanın hakimiyyətyönlü partiyası bələdiyyə seçkiləri ilə bağlı bütün şəhər və rayon təşkilatlarında seçki qərargahları yaradıb.
"İndi bütün yerli təşkilatlarda bələdiyyə üzvlüyünə irəli sürülən namizədlərin siyahısı partiyanın Mərkəzi Seçki Qərargaına göndərilir", - cümə axşamı Trend -a Demokratik Azərbaycan Dünyası Partiyasının (DADP) sədri Məmməd Əlizadə bildirib.
Trend -un arayışı: Azərbaycanda bələdiyyə seçkisinin 2009-cu il dekabrında keçirilməsi nəzərdə tutulur. Bundan əvvəl iki dəfə - 1999 və 2004-cü illərdə yerli özünüidarəetmə orqanlarına seçkilər keçirilib.
Azərbaycanda bələdiyyələrin birləşdirilməsi prosesi nəticəsində onların sayı 2760-dan 1718-ə qədər enib.
Əlizadənin sözlərinə görə, partiyanın bütün bələdiyyələr üzrə namizədləri irəli sürüləcək. "Biz bu seçkiyə təkbaşına gedirik, heç bir partiya ilə əməkdaşlıq etməyəcəyik və ciddi uğur qazanacağımıza inanırıq", - DADP sədri əlavə edib.
Onun fikrincə, partiyanın çox böyük seçki təcrübəsi olduğundan hər hansı siyası təşkilatla birgə seçkilərdə iştirak etməsinə ehtiyac yoxdur. "Biz ölkənin ən mükəmməl təşkilatlanmış partiyalarından biriyik. Bu səbəbdən seçkilərdə təkbaşına iştirak etməyimizdə heç bir problemlə üzləşməyəcəyimizə əminəm", - Əlizadə vurğulayıb.
Hakimiyyətyönlü Demokratik Azərbaycan Dünyası Partiyası (DADP) 1992-ci ildə təsis olunub və 1993-cü ildə Ədliyyə Nazirliyi tərəfindən dövlət qeydiyyatına alınıb. Təşkilata Məmməd Əlizadə rəhbərlik edir. Partiya 1993-cü ildə hakimiyyətə gələn Yeni Azərbaycan Partiyasının siyasətini dəstəkləyir.
Məqalə müəllifi ilə əlaqə ünvanı: [email protected]