Azərbaycan, Bakı, 13 aprel /Trend, müxbir A.Hüseynbala/
Azərbaycanın iqtidaryönlü partiyasının rəhbəri deyib ki, Parlament seçkilərində daha çox öz sosial bazalarından istifadə edəcəklər.
"Deputatlığa namizədlərin irəli sürülməsi prosesində yalnız hakim Yeni Azərbaycan Partiyası ilə məsləhətləşmələr aparacağıq",- çərşənbə axşamı Trend-ə Ana Vətən Partiyasının (AVP) sədri, millət vəkili Fəzail Ağamalı bildirib.
Trend-in arayışı: Azərbaycanda Parlament seçkilərinin 2010-cu ilin payızında keçiriləcəyi gözlənilir. Bundanəvvəlki seçkilər 2005-ci ilin noyabr ayında keçirilib. Azərbaycanda Parlament seçkiləri majoritar sistem üzrə 125 seçki dairəsində keçirilir.
Onun sözlərinə görə, seçkilərdə digər iqtidaryönlü partiyalarla müttəfiqlik etmək niyyətində deyillər: "Biz deputatlığa yalnız seçilmək şansı olan partiya üzvlərinin namizədliyini irəli sürəcəyik. Bu zaman namizədlərin bir-birinə mane olmaması üçün hakim partiya ilə məsləhətləşmələr aparacağıq", - Ağamalı əlavə edib.
Millət vəkili deyib ki, əvvəlki seçkilərdə də partiya xüsusi taktika ilə iştirak edib: "Bu dəfə də ənənəmizə sadiq qalacağıq. Düşünürəm, bu ilin noyabrında keçiriləcək seçkilərdə təbliğat və təşviqatımızı elə qurmalıyıq ki, daha çox mandat qazana bilək", - o vurğulayıb.
Hakimiyyətyönlü AVP 1991-ci ildə yaradılıb. Partiya Parlamentdə iki deputatla təmsil olunub.
