Azərbaycan, Bakı, 7 may /Trend, müxbir M.Əliyev/
Nyu-Meksiko ştatının qubernatoru Bill Riçardson Ümummilli Lider Heydər Əliyevin anadan olmasının 87 illiyi ilə əlaqədar Azərbaycan tərəfinə rəsmi təbrik məktubu göndərib. Bu barədə Azərbaycanın Los-Ancelesdəki Baş Konsulluğundan qubernatorluğun ofisinə istinadən məlumat verilib.
Məktubda deyilir ki, Heydər Əliyev tarixi rol oynayan novator və lider idi.
Prezident Klinton administrasiyasında energetika naziri postunu tutmuş görkəmli Amerika siyasətçisi Bill Riçardson Heydər Əliyevlə şəxsən tanış idi və ötən yüzilliyin 90-cı illərində strateji regional enerji layihələrinin reallaşdırılmasında birbaşa iştirak edib. O, 2008-ci ildə ABŞ prezidenti postuna öz namizədliyini irəli sürmüşdü.
