Аzərbaycan, Bakı, 5 iyun /Trend, müxbir А.Qasımova/
Avropa Şurası Parlament Assambleyasının (AŞPA) yay sessiyasında Azərbaycandakı demokratik institutların fəaliyyəti müzakirə olunacaq. Bu barədə AŞ-nin məlumatında deyilir.
Sessiyanın ilk günündə Avropa Şurası bürosu və siyasi qrupları iclas keçirəcəklər və 2011-ci il üçün təşkilatın büdcəsinə baxılacaq.
Həmçinin sessiya ərzində Avropa məhkəməsinə Almaniya və Maltadan hakimlərin seçilməsi planlaşdırılır.
"Şimali Qafqazda insan haqlarının pozulması", "Kosovoda vəziyyət və AŞ-nin rolu", "Rumınların Avropada rolu" məsələləri müzakirə olunacaq.
Sessiyada BMT-nin "Sivilizasiya alyansı" üzrə baş katibi Xorxe Sampayo, Çernoqoriyanın Baş naziri Milo Dukanoviç və Makedoniya Prezidenti Georgi İvanovun çıxışları gözlənilir.