Azərbaycan, Bakı, 13 oktyabr /Trend, müxbir M.Əliyev/
Çərşənbə günü Milli Məclisdə 2011-ci il Dövlət Büdcəsinin müzakirələri keçirilib.
"Dövlət Büdcəsinin layihəsi bugünkü tələblərə cavab verir. Müharibə vəziyyətində olan dövlətin prioritetləri hərbi potensialın artırılmasından ibarətdir", - deputat Aydın Mirzəzadə öz çıxışında bildirib.
Eyni zamanda o, büdcədə təhsil və səhiyyə işçilərinin əmək haqlarının artırılmasının nəzərə alınması barədə istəyini ifadə edib.
Deputat Musa Quliyev hesab edir ki, 2011-ci ilin büdcəsi ölkənin uğurlu sosial-iqtisadi inkişafını təmin edir. "Azərbaycanda səhiyyə sahəsində 10 dövlət proqramı həyata keçirilir. Gələn il icbari tibbi sığortanın genişləndirilməsi və dövlət qulluqçularının bura cəlb edilməsi zəruridir", - Quliyev bidlirib.
Öz növbəsində, deputat Nəsib Nəsibli Dövlət Büdcəsi layihəsində nəzərdə tutulan vəsaitin yetərli olmadığını hesab edir. Onun sözlərinə görə, bu sahədə çoxlu sayda problemlərin olmasına baxmayaraq, 2010-cu illə müqayisədə onlar cəmi 10 faiz artırılıb.