Azərbaycan, Bakı, 11 noyabr /Trend, müxbir S.Ağayeva/
Dünyanın ən qədim kitabxanalarından biri olan İsgəndəriyyə Kitabxanasının rəhbəri İsmayıl Siracəddin Bakıda Azərbaycana ikigünlük səfəri çərçivəsində əməkdaşlıq perspektivlərini müzakirə edəcək. Bu barədə Trend-ə cümə axşamı Azərbaycanın Misirdəki səfiri Şahin Abdullayev deyib.
"Noyabrın 19-20-də Azərbaycan hökumətinin dəvəti ilə baş turacaq səfər zamanı İsgəndəriyyə Kitabxanasının rəhbəri Azərbaycan Diplomatiya Akademiyasında, Abşeron rayonunda yerləşən Süzanna Mübarək adına ərəb diliyönümlü orta məktəbdə, Ailə, Qadın və Uşaq Problemləri üzrə Dövlət Komitəsində olacaq", - diplomat qeyd edib.
Səfər proqramına Azərbaycanın ikinci böyük şəhəri Gəncəyə səfər də daxil edilib. Yüksək qonaq orada Kənd Təsərrüfatı Akademiyasında olacaq və təhsil müəssisəsinin rəhbərliyi ilə görüşəcək.
İsgəndəriyyə Kitabxanasının rəhbəri, Misir Prezidentinin elm və təhsil məsələri üzrə müşaviri İsmayıl Siracəddin ölkə rəsmiləri ilə görüşlər keçirəcək, elm və təhsil sahəsində əməkdaşlığın dərinləşdirilməsi məsələsini müzakirə edəcək.
Misirin İsgəndəriyyə şəhərinin qədim kitabxanası 2500 il bundan əvvəl tikilib. Kitabxana dövrünün başlıca elm mərkəzlərindən hesab olunub. Orada Arximed və Evklid çalışıb.
Misir hökuməti Kitabxanaya xüsusi status verib. Onun rəhbərləri şəxsən ölkə Prezidentinə tabedirlər.
2010-cu il üçün dünya universitetlərinin reytinqinin məlumatına əsasən, İsgəndəriyyə Universiteti 147-ci yeri tutur və təkcə Misirdə deyil, eləcə də Yaxın Şərqdə nüfuzlu ali məktəblərdən biri hesab olunur.
