Azərbaycan, Bakı, 23 noyabr /Trend, müxbir T.Hacıyev/
Azərbaycan Xalq Cəbhəsi (AXCP) və Müsavat partiyalarını geridə qalmış düşüncə tərzi məğlubiyyətə məhkum edir. Bu barədə çərşənbə axşamı Trend-ə hakim Yeni Azərbaycan Partiyasının (YAP) icra katibinin müavini Siyavuş Novruzov bildirib.
"Azərbaycan müxalifəti də ölkənin inkişaf tempi ilə uyğunlaşmalıdır. Azərbaycanda proseslər çox sürətlə gedir. Ölkə inkişaf edir. Seçki öncəsi debatlar da göstərdi ki, müxalifətin bəzi nümayəndələrinin düşüncə tərzi iyirmi il bundan əvvəlki səviyyədə qalıb. Onların düşüncə tərzi, fikirləri, rəyləri həmin səviyyədədir. Ona görə də o adamlar partiyanı geri aparır və onun inkişafına mane olurlar", - Novruzov əlavə edib.
Azərbaycanda noyabrın 7-də keçirilən parlament seçkilərində AXCP və Müsavat partiyalarının 30-dan artıq namizədi məğlubiyyətlə üzləşiblər. Hər iki partiyanın rəhbərliyi seçkilərin nəticələrini tanımadığını bəyan edib.
Novruzovun sözlərinə görə, AXCP və Müsavat partiyaları kimi bir neçə partiya var ki, həmin partiyalar bir qrup adamın əlində alətə çevrilib.
"Həmin insanlar Azərbaycanda siyasi sistemin formalaşmasında, inkişafında maraqlı deyillər. Onlar həmin partiyaları özləri üçün iş yeri seçiblər. Partiyaya zavod və ya fabrik kimi baxırlar", - o, deyib.
YAP funksioneri düşünür ki, bu cür adamların səylərinə baxmayaraq, Azərbaycanda kifayət qədər yeni müxalifət partiyaları formalaşıb.
"AXCP-nin tərkibindən bir neçə partiya yaranıb. Hamısı da müxalifət partiyalarıdır. O partiyaların üzvləri Azadlıq hərəkatında iştirak etmiş insanlardır. Artıq Azərbaycanda bu proses gedir. Bu onunla əlaqədardır ki, bəzi partiyalardakı şəxslər partiyanı öz şəxsi manapoliyasına çevirib və partiyanın inkişafına, irəli getməsinə heç bir imkan yaratmırlar. Bu da, nəticə etibarı ilə həmin partiyaların dağılmasına, parçalanmasına gətirir", - Novruzov bildirib.
YAP funksioneri qeyd edib ki, həmin partiyalarda fikir plüralizmi və demokratiyadan söhbət gedə bilməz.
"Bu səbəbdən həmin partiyaların tərkibindən yeni partiyalar yaranır. Müxalifətin yeni nəsli Avropa düşüncəli, Avropa təhsilli insanlardır ki, onlar proseslərə artıq yeni düşüncə ilə yanaşırlar" - o, vurğulayıb.
AXCP və Müsavat partiyalarından YAP-ın ittihamlarına şərh vermək istəmədiklərini bildiriblər.
