Azərbaycan, Bakı, 11 oktyabr /Trend/
Avstriyanın Federal Prezidenti Haynts Fişer oktyabrın 11-də Azərbaycana rəsmi səfərə gəlib.
Trend-in məlumatına görə, hər iki ölkənin dövlət bayraqlarının dalğalandığı Heydər Əliyev Beynəlxalq Aeroportunda ali qonağın şərəfinə fəxri qarovul dəstəsi düzülüb.
Avstriya Prezidenti Haynts Fişeri hava limanında Azərbaycan Baş nazirinin birinci müavini Yaqub Eyyubov və digər rəsmi şəxslər qarşılayıblar.
Milli geyimli uşaqlar Avstriya Prezidentinə və xanımı Margit Fişerə gül dəstəsi təqdim ediblər.
Hava limanının ali qonaqlar üçün salonunda Prezident Haynts Fişer və Baş nazirin birinci müavini Yaqub Eyyubov arasında qısa protokol söhbəti olub.