Azərbaycan, Bakı, 25 yanvar / Trend müxbir M.Əliyev/
Azərbaycanda optik cihazların istehsal xəttinin yaradılması prosesi başa çatmaq üzrədir. Trend-in məlumatına görə, bu barədə Azərbaycan müdafiə sənayesi nazirinin müavini Yəhya Musayevin "Azərbaycan-Türkiyə əlaqələri son 20 ildə: uğurlar və imkanlar" adlı məqalələr toplusunda dərc olunan yazısında bildirilir.
Nazir müavini məqalədə qeyd edib ki, İstanbulda keçirilən IX Beynəlxalq Müdafiə Sənayesi Sərgisi (İDEF-2009) zamanı Müdafiə Sənayesi Nazirliyi Türkiyənin "Aselsan" şirkəti ilə optik sahədə əməkdaşlıq etməklə bağlı müqavilə imzalayıb.
"Bunun nəticəsində müəssisələrimizdə müasir texnologiya ilə istehsal edilən optik cihazlar istehsal olunacaq. Hazırda istehsal xəttinin yaradılması prosesi başa çatmaq üzrədir", - Musayev bildirib.
Onun qeyd etdiyinə görə, bununla əlaqədar Azərbaycandan bir sıra mütəxəssislər "Aselsan" şirkətində ixtisasartırma kursları keçirlər.
