Azərbaycan, Bakı, 31 yanvar /Trend, müxbir A.Tağıyeva/
Fransalı senatorlar qondarma "erməni soyqırımı"nın inkarına görə cinayət məsuliyyətini nəzərdə tutan qanunun ləğvi tələbi ilə Konstitusiya Şurasına müraciət etməklə öz ölkələrinin tarixi dəyərlərini qoruyurlar. Trend-in "TRT Haber" telekanalına istinadən verdiyi məlumata görə, bu barədə çərşənbə axşamı Türkiyənin xarici işlər naziri Əhməd Davudoğlu bildirib.
Davudoğlu deyib ki, senatorların müraciətindən sonra yalnız Konstitusiya Şurasının qərarını gözləmək qalır.
Fransalı senatorlar qondarma "erməni soyqırımı"nın inkarına görə cinayət məsuliyyətini nəzərdə tutan qanunun ləğv edilməsi üçün lazımi sayda imza toplayıblar.
Senatorlar lazım olan 60 imza əvəzinə 70 imza toplayıblar və bununla da onlar bu gün Konstitusiya Şurasına müraciət edəcəklər.
Yanvarın 23-də Fransa Senatı təxminən səkkiz saatlıq müzakirələrdən sonra qondarma "erməni soyqırımı"nın inkarına görə cinayət məsuliyyətinin tətbiqi barədə qanun layihəsini qəbul edib. Qanun layihəsinin lehinə 127, əleyhinə isə 86 senator səs verib.
Qanun layihəsi qondarma "erməni soyqırımı"nı inkar edənlərə qarşı bir ilədək azadlıqdan məhrumetmə cəzası və 45 min avro həcmində cəriməni nəzərdə tutur.
Ermənistan və erməni lobbisi bəyan edir ki, Türkiyənin sələfi olan Osmanlı dövləti 1915-ci ildə Anadoluda yaşayan ermənilərə qarşı soyqırım törədib. Erməni təbliğatının təzyiqi ilə bir sıra ölkələrin parlamentləri 1915-ci il qondarma "soyqırım"ı tanıyıblar.