...

Azərbaycan Prezidenti və xanımı Bakıda “JW Marriott Absheron” otelinin açılışında iştirak ediblər (FOTO)

Siyasət Materials 1 Aprel 2012 14:00 (UTC +04:00)
Aprelin 1-də Azərbaycan Respublikasının Prezidenti İlham Əliyev və xanımı Mehriban Əliyeva Bakıda “JW Marriott Absheron” otelinin açılışında iştirak etmişlər.
Azərbaycan Prezidenti və xanımı Bakıda “JW Marriott Absheron” otelinin açılışında iştirak ediblər (FOTO)

Azərbaycan, Bakı, 1 aprel /Trend/

Aprelin 1-də Azərbaycan Respublikasının Prezidenti İlham Əliyev və xanımı Mehriban Əliyeva Bakıda "JW Marriott Absheron" otelinin açılışında iştirak etmişlər.

Dövlətimizin başçısı otelin rəmzi açılışını bildirən lenti kəsdi.

Azərbaycan Prezidenti oteldə yaradılmış şəraitlə tanış oldu.

Məlumat verildi ki, köhnə "Abşeron" mehmanxanasının yerində tikilən yeni "JW Marriott Absheron" oteli dünya şöhrətli "Marriott International" şirkətinin ölkəmizdəki ilk otelidir.

Bakıda beynəlxalq səviyyəli bu cür otellərin tikilməsi ölkəmizdə turizmin inkişafının istər yerli, istərsə də xarici şirkətlər üçün yaradılan əlverişli investisiya mühitinin bariz göstəricisidir.

Qeyd edildi ki, oteldə otaqların layihələndirilməsi və tərtibatı zamanı Azərbaycanın təbiəti, memarlıq abidələri, eləcə də Xəzər dənizinin elementləri öz əksini tapmışdır. Ümumilikdə oteldə 243 otaq vardır.

Oteldə Şərq mətbəxinin təamlarının təklif edildiyi "Fireworks Oriental Kitchen", İtaliya mətbəxinin nümunələri olan "OroNero Bar&Ristorante" restoranları, "Razzmatazz Cocktail&Lounge" barı və "Zest Lifestyle" kafesi vardır. Burada, həmçinin Azadlıq meydanı tərəfdən xüsusi girişi olan restoranlar, bar və kafe fəaliyyət göstərir.

Bildirildi ki, otelin binasının üst üç mərtəbəsini əhatə edən "Abşeron Spa" mərkəzində qonaqlar Bakının və Xəzər dənizinin füsunkar mənzərəsini seyr etmək imkanına malik olacaqlar. Mərkəzdə altı prosedur otağı, daxili hovuz, buxar otağı və sauna vardır.

Qeyd edildi ki, işgüzar görüşlər və konfransların keçirilməsi üçün oteldə təbii Günəş işığı ilə işıqlandırılan 13 iclas zalı vardır. Otelin mirvarisi hesab olunan 1208 kvadratmetrlik sütunsuz "Şərq" zalında böyük tədbirlərin, sərgilərin və digər mərasimlərin keçirilməsi üçün hər cür şərait yaradılmışdır.

Dövlətimizin başçısı otelin terrasında oldu. Məlumat verildi ki, otelin həyətindən bulvara çıxan yeraltı keçid də tikilir.

Prezident İlham Əliyev otelin kollektivi ilə görüşdü.

Sonda xatirə şəkli çəkdirildi. Dövlətimizin başçısı oteldə yaradılmış şəraiti yüksək qiymətləndirdi.

Xəbər lenti

Xəbər lenti