Azərbaycan, Bakı, 8 iyun /Trend/
Azərbaycan xarici işlər nazirinin müavini Mahmud Məmməd-Quliyev iyunun 11-də Serbiyanın paytaxtı Belqrad şəhərinə səfər edəcək.
XİN-in mətbuat xidmətindən cümə günü Trend-ə verilən məlumata görə, Məmməd-Quliyevin səfərində məqsəd Qara Dəniz İqtisadi Əməkdaşlıq Təşkilatı (QDİƏT) üzv dövlətlərinin Xarici İşlər Nazirləri Şurasının 26-cı görüşündə iştirak etməkdir.
Görüşdə QDİƏT-in Daimi Beynəlxalq Katibliyində vakant vəzifələrə (baş katib, baş katibin müavini və icraçı menecerlər) yeni təyinatlarla bağlı keçiriləcək seçkilərin nəticələri, təşkilatın üzv dövlətləri arasında əməkdaşlığın və Nazirlər Şurasının qətnamə, qərar və tövsiyələrinin yerinə yetirilməsinin hazırkı vəziyyəti, QDİƏT-Avropa İttifaqı əməkdaşlığı və təşkilatın fəaliyyəti ilə bağlı gündəlikdə olan digər mühüm məsələlərin müzakirə edilməsi planlaşdırılır.
Tədbirin sonunda Nazirlər Şurasının görüşünün hesabatının qəbul edilməsi nəzərdə tutulur.