Azərbaycan, Bakı, 12 sentyabr /Trend, müxbir E.Tariverdiyeva/
Macarıstan bilirdi ki, Ramil Səfərovun Azərbaycana ekstradisiya edilməsi barədə qərar Ermənistanın diplomatik dairələrinin mənfi reaksiyasına səbəb olacaq. Trend-in "Reuters" agentliyinə istinadən verdiyi məlumata görə, bunu Macarıstanın Baş naziri Viktor Orban deyib.
"Origo.hu" portalı məlumat verir ki, Baş nazir risk barədə məlumatlandırılmasına baxmayaraq, qərar qəbul edib.
"Məsələ hökumətdə razılaşdırılmışdı, - Orban qeyd edib. - Hər bir nazirlik məsələyə öz baxışını nəzərə çatdırdı. Ədliyyə Nazirliyi məsələnin hüquqi tərəfinə, Xarici İşlər Nazirliyi isə diplomatik nəticələrinə dair rəyini təqdim etdi".
Orbanın sözlərinə görə, o, ümumi prosedura uyğun olan qərarı elan edib.
"Xarici İşlər Nazirliyi bu və ya digər qərarın hansı nəticələr törədə biləcəyini proqnozlaşdırmışdı", - o əlavə edib.