Azərbaycan, Bakı, 17 fevral /Trend, müxbir İ.İzzət/
"Azərbaycanın həyata keçirdiyi təşəbbüslər, layihələr Avropanın enerji və nəqliyyat xəritəsini dəyişib. Cənab Prezident dəfələrlə qeyd edib ki, TANAP layihəsinin ümumilikdə həm Azərbaycan, həm də Azərbaycanın tərəfdaşları tərəfindən maliyyələşdiriləcək". Trend xəbər verir ki, bunu jurnalistlərə açıqlamasında Prezident Administrasiyasının Siyasi təhlil və informasiya təminatı şöbəsinin müdiri Elnur Aslanov deyib.
TANAP tərəfdaşlarının layihəni öz kapitalları hesabına reallaşdırılması barədə məlumatı şərh edən E.Aslanov bildirib: "Təbii ki, bu layihənin maliyyələşməsi Azərbaycanın Avropanın enerji təhlükəsizliyində fəal iştirakını təmin edəcək. Eyni zamanda gələcəkdə istər TAP layihəsinin, istər Cənub Qaz Dəhlizinin reallaşması ilə Avropanın enerji təhlükəsizliyinin təmin olunmasına töhfə verəcək".