Bakı. Trend:
Azərbaycan Prezidenti İlham Əliyev Əziz Cəmil oğlu Əliyevin İ.M.Seçenov adına Birinci Moskva Dövlət Tibb Universitetinin Bakı filialının rektoru təyin edilməsi haqqında sərəncam imzalayıb.
Əliyev Əziz Cəmil oğlu 16 yanvar 1975-ci ildə Bakı şəhərində anadan olub. 1992-ci ildə Bakı şəhəri 134 saylı orta məktəbi bitirib.
1992-ci ildə Nyu-York Universitetində təhsilə başlayıb və 1999-cu ildə həmin universiteti bitirib. 1999-cu ilin iyul ayından 2002-ci ilin iyul ayınadək Pittsburq Tibb Universitetində (ABŞ) rezidentura təhsili alıb. Rezidentura müddəti ərzində üz-çənə cərrahiyyəsi, müxtəlif bölmələr və baş-boyun şişlərinin cərrahiyyəsi üzrə rotasiyalardan keçib.
Ə.Əliyevin ABŞ-da müdafiə etdiyi elmi işi 2003-cü ildə Azərbaycan Respublikası Prezidentinin yanında Ali Attestasiya Komissiyası tərəfindən nostrifikasiya edilib, tibb elmləri namizədi dissertasiyası kimi təsdiq edilib və ona tibb elmləri namizədi alimlik dərəcəsi verilib. 2006-cı ilin sentyabrından 2011-ci ilin dekabrınadək Azərbaycan Tibb Universitetinin üz-çənə cərrahiyyəsi kafedrasında dosent vəzifəsində çalışıb. 2008-ci ilin martında "Xərçəng və şiş ərəfəsi proseslər zamanı ağız boşluğunun selikli qişasında hormonlar və molekulyar-bioloji markerlər" ("Гормоны и молекулярно-биологические маркеры при раке и предопухолевых процессах слизистой оболочки полости рта") mövzusunda tibb elmləri doktoru dissertasiyasını uğurla müdafiə edib.
Ə.Əliyev 2011-ci ildən 2013-cü ilədək "Barmherzigen Schwestern" (Lints, Avstriya) klinikasında baş-boyun şişləri şöbəsində cərrah-onkoloq vəzifəsində calışıb.
2013-cü ildən Azərbaycan Tibb Universitetinin müalicə işi üzrə prorektoru vəzifəsində çalışır.
2013-cü ildən Azərbaycan Respublikasının Milli Onkologiya Mərkəzinin baş-boyun şişləri şöbəsində cərrah-onkoloq vəzifəsində əvəzçilik üzrə çalışır. Evlidir, iki övladı var.