Bakı. Samir Əli -Trend:
Əməliyyatlar təmas xəttində Azərbaycanın mülki şəxslərə hücumu ilə başlayıb.
Trend-in məlumatına görə, bunu Azərbaycan Respublikası Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev deyib.
Onun sözlərinə görə, bu barədə beynəlxalq ictimaiyyətə çatdırılıb: "Tovuz hadisələrindən başlayaraq regional gərginlik provakasiyasıdır. Bu da Ermənistan siyasi hakimiyyəti tərəfindən həyata keçirilən təxribatdır. Azərbaycan əks-hücumlara başlayaraq onların atəş nöqtələrini susdurub: "Çətin vəziyyətə düşən düşmən təmas xəttində mülki Azərbaycan əhalisini hədəfə alıb. Dünən Naftalan şəhərində ermənilərin ağır artilleriya atəşi zamanı bir ailənin 5 üzvü həlak olub. Bu gün Tərtərdə ermənilərin atəşi nəticəsində qadınlar üçün nəzərdə tutulan toxuculuq sexinə ziyan dəyib. Bundan əlavə Tərtər rayonunda polis şöbəsinə və məcburi köçkünlər üçün inşa olunan şəhərciyə atəş açılıb. Hadisə nəticəsində ümumilikdə 14 mülki Azərbaycan vətəndaşı həlak olub. Azərbaycan Silahlı Qüvvələri bu hücumların qarşısını almaq üçün əks-həmləyə başlayıb və mülki əhalinin təhlükəsizliyini təmin edir. Azərbaycan Ermənistanı həmişə sülhə çağırsa da, ermənilər Azərbaycana qarşı təxribatlara əl atır. Beynəlxalq ictimaiyyətin narahatlığını başa düşürük. Amma beynəlxalq ictimaiyyətə bildiririk ki, Ermənistan işğala son qoymalıdır. Bəzi beynəlxalq təşkilatlar qərəzli mövqe nümayiş etdirir. Erməni lobbisinin vəsaiti ilə maliyyələşən bəzi qrumlar bizim mövqeyimizi nəzərə almadan qərəzli bəyanatlar yayıblar. Azərbaycan Respublikasına qarşı müharibə aparılır. Azərbaycan ərazisinə qarşı 30 ildir ki müharibə aparılır. Biz isə istəyirik ki, Ermənistan işğalçı mövqeyinə son qoysun. Bu, böyük Vətən müharibəsidir. Azərbaycan ərazisində hərbi vəziyyət elan olunub və bu gün də ölkədə qismən səfərbərlik elan edilib. Beynəlxalq hüquqdan istifadə edirik. Amma bunun əksini Ermənistan silahlı qüvvələrində müşahidə edirik".