Bakı. Trend:
Milli Məclisə keçirilən seçkilərdə seçki kampaniyasını davam etdirən 58 saylı Xaçmaz kənd seçki dairəsindən deputatlığa namizəd Sevil Mikayılova seçicilərlə növbəti görüşlər keçirib.
Trend xəbər verir ki, deputatlığa namizəd Sevil Mikayılova Çinartala kəndində Hacıyevlər ailəsində olub.
73 yaşlı Zakir Hacıyev ölkəmizdə Prezident Ilham Əliyevin rəhbərliyi altında bütün sahələrdə uğurla aparılan islahatlardan məmnunluq ifadə edib. O, bütöv Azərbaycanda ilk dəfə keçiriləcək növbədənkənar parlament seçkilərində iştirak edəcəyindən qürur duyduğunu bildirib.
Daha sonra Sevil Mikayılova seçkiqabağı təşviqat çərçivəsində növbəti görüşünü İstisu qəsəbəsində keçirib.
Seçicilərin böyük maraq göstərdiyi və fəal iştirak etdiyi görüşdə Sevil Mikayılova Müzəffər Ali Baş Komandan, Azərbaycan Respublikasının Prezidenti İlham Əliyevin apardığı düşünülmüş daxili və xarici siyasət nəticəsində ölkəmizin son illərdə əldə etdiyi uğurlardan söz açaraq qeyd edib ki, dövlət başçısının rəhbərliyi ilə həyata keçirilən uğurlu islahatlar ölkəmizin sosial-iqtisadi inkişafına, beynəlxalq aləmdə Azərbaycanın nüfuzunun artmasına, insanların sosial rifahının yaxşılaşmasına xidmət edir.
Görüş zamanı, həmçinin, Sevil Mikayılova deputat kimi fəaliyyəti dövründə gördüyü işlər barəsində seçiciləri ətraflı məlumatlandırıb.
Həmçinin, seçiciləri maraqlandıran məsələlər ətrafında fikir mübadiləsi aparılıb və onların sualları cavablandırılıb.
Sevil Mikayılova Xudat şəhərində yerləşən Uşaq Gənclər İnkişaf Mərkəzində də olub. Şagirdlərin asudə vaxtlarının səmərəli təşkilini təmin edən məktəbdənkənar müəssisənin mütəmadi uğurları xüsusi qeyd olunub. Azərbaycan dövlətinin daim uşaqların təhsili, təlim-tərbiyəsinə qayğı və diqqətlə yanaşdığı, bu xüsusda məktəbdənkənar müəssisələrin fəaliyyətinin əhəmiyyəti vurğulanıb.
