Bakı. Trend:
Azərbaycan və Ermənistan sərhədlərin delimitasiyası və demarkasiyası məsələsində irəliləyişə nail olublar.
Trend Rusiya KİV-lərinə istinadən xəbər verir ki, bunu Rusiya baş nazirinin müavini Aleksey Overçuk jurnalistlərə açıqlamasında bildirib.
O, azərbaycanlı və erməni həmkarları Şahin Mustafayev və Mger Qriqoryan ilə birlikdə həmsədrlik etdiyi üçtərəfli işçi qrupunun fəaliyyətini davam etdirib-etdirmədiyi barədə suala cavabında bildirib ki, “formal olaraq onu heç kim dayandırmayıb”.
“Biz vaxtaşırı bu mövzuda söhbətlər aparırıq, amma üç tərəfli formatda yox, necə deyərlər, təkbətək... Mənim həmkarlarım sərhədlərin delimitasiya və demarkasiyası üzrə komissiya çərçivəsində mütəmadi olaraq görüşürlər. Orada böyük və yaxşı irəliləyişə nail olublar”, - deyə Overçuk bildirib.
Overçuk vurğulayıb ki, sərhədin bir hissəsi artıq delimitasiya və demarkasiya olunub və tərəflər müvafiq məsələdə şimaldan cənuba - Azərbaycan, Ermənistan və Gürcüstan sərhədlərinin kəsişmə nöqtəsindən irəliləmək barədə razılığa gəliblər.
“Biz hər zaman bu cür təmasları və bu cür işi təqdir etmişik, çünki bu, sözsüz ki, regionda sabitliyə xidmət göstərəcək. Öz tərəfimizdən biz də hər zaman bu prosesə dəstək olmağı təklif etmişik. Bu çox konstruktiv işdir”, - deyə o bildirib.