"Şimali Kipr Türk Cümhuriyyətindən gələn nümayəndə heyətinin Azərbaycanda bu formada qarşılanması məqsədəuyğundur və hesab edirəm ki, bunun heç bir təhlükəsi yoxdur. Azərbaycanın Şimali Kiprdə əlaqələr qurmasını diplomatik baxımdan düzün addım sayıram". Bu fikirləri Trend ə açıqlamasında Böyük Quruluş Partiyasının (BQP) başqanı Fazil Qəzənfəroğlu bildirib.
Şimali Kipr Türk Cümhuriyyətindən nümayəndə heyətinin Azərbaycana ilk səfərləri barədə fikirlərini bölüşərkən F.Qəzənfəroğlu deyib ki, adada referendum keçiriləndən sonra BMT-nin baş katibi Kofi Annan da dünya dövlətlərinə müraciət etmişdi. Çünki referendumda yunanların rədd cavabı verməsi, türklərin isə konstruktiv mövqe nümayiş etdirməsi situasiyasını xeyli dəyişmişdi. "İndiki vəziyyətdə ABŞ-ın da Kipr məsələsinə loyal yanaşması onu göstərir ki, Azərbaycanın rəsmi hakimiyyətinin Şimali Kiprlə əlaqələr qurmasında sıxıntı yaranmayacaq. Onsuz da həm Yunanıstan, həm də Ermənistan Azərbaycanın maraqlarına zidd fəaliyyətlərini davam etdirirlər. Azərbaycanın kiminsə istəyi ilə hərəkət etməsi doğru olmaz"-deyə F.Qəzənfəroğlu bildirib.
Şimali Kiprlə əlaqələr qurulmasını diplomatik baxımdan düzgün addım hesab etdiyini deyən BQP başqanı əlavə edib ki, adanın şimalı ilə iqtisadi əlaqələrin formulunun indidən tapılması lazımdır. Çünki iqtisadi əlaqələri sonradan tədricən siyasi əməkdaşlığa çevirmək mümkün olacaq.
BQP başqanı Yunanıstanın təhdidlərinə də münasibətini bildirərkən Qarabağla Kiprin statusunun eyni olmadığını deyib: "Kiprdə bir adada ayrı-ayrı dövlətlərin meydana çıxması məsələsi var. Yunanıstan Qarabağla əlaqələr yarada bilməz, çünki onun bu addımı Azərbaycanın ərazi bütövlüyünü tanımaması demək olar. Azərbaycan başqa ölkənin ərazisinə təcavüz etmir, Kipr adası da Yunanıstanın monopoliyasında deyil. Kipr məsələsi beynəlxalq mandat altındadır, Qarabağla əlaqədar isə mandat yoxdur"-deyə F.Qəzənfəroğlu bildirib. O, əlavə edib ki, əgər Yunanıstan Azərbaycanın ərazi bütövlüyünə qarşı hər hansı addım atarsa, bu, beynəlxalq normalara zidd olacaq və qınaqla qarşılanacaq.
"Şimali Kiprlə əlaqələrin indiki səviyyəsi isə təhlükə yaratmır, çünki hər hansı tanınma söhbəti yoxdur, yalnız iqtisadi əməkdaşlıq məsələsi gündəmdədir. ABŞ da qərara gəlib ki, Kiprə iqtisadi yardım göstərsin. Yunanıstan qeyri-konstruktiv mövqe nümayiş etdirsə, onda gərək ABŞ-ın da əleyhinə çıxsın" - deyə F.Qəzənfəroğlu vurğulayıb.
