Bakı Şəhər İcra Hakimiyyəti "Azadlıq" blokunun 25 sentyabr mitinqi ilə bağlı təklif etdiyi marşrutların heç birinə razılıq verməyib. Bu barədə Trend ə blokda təmsil olunan Azərbaycan Demokrat Partiyasından məlumat verilib.
Qeyd edək ki, "Azadlıq" bloku növbəti aksiyasının keçiriləcəyi yerlə bağlı Bakı Şəhər İcra Hakimiyyətinə 6 marşrut təklif etmişdi. Lakin şəhər rəhbərliyindən daxil olan cavab məktubunda deyilir ki, həmin marşrutların heç biri kütləvi aksiya keçirmək üçün məqsədəuyğun deyil. Bunun əvəzində Bakı Şəhər İcra Hakimiyyəti "Azadlıq" blokuna özü 3 marşrut təklif edib. Bunlar metronun "20 Yanvar" stansiyası yaxınlığından "Qələbə" meydanınadək yürüş-mitinq, "Motodrom" stadionunda və Azərneftyağ Emal Zavodunun stadionunda mitinq keçirməyi təklif edib.
Şəhər rəhbərliyinin cavabı ilə bağlı "Azadlıq" bloku liderlərinin müşavirəsi keçirilib. Qərara alınıb ki, Bakı Şəhər İcra Hakmiyyətinin cavabından asılı olmayaraq, "28 May" metrosunun yaxınlığında Cəfər Cəbbarlı heykəlinin qarşısındakı meydanda mitinq keçirilsin. Blok liderləri qərarını dəyişmək fikrində olmadığından Bakı Şəhər İcra Hakimiyyətinə yenidən müraciət etməyə ehtiyac görmədiklərini bildiriblər.
ADP sədrinin birinci müavini Sərdar Cəlaloğlu bildirib ki, Bakı Şəhər İcra Hakimiyyətinin təklif etdiyi meydanlar blokun istədiyi kimi aksiya keçirməsi üçün əlverişli deyil. "Azadlıq" blokunun dəfələrdə mitinq keçirdiyi "Qələbə" meydanından da imtina edilib, çünki blok liderləri şəhərin mərkəzində seçicilərlə görüşmək, öz fikirlərini daha geniş kütləyə çatdırmaq istəyirlər. Eyni zamanda S.Cəlaloğlu aksiya iştirakçılarının "Qələbə" meydanına sığışmadıqlarını deyib. Onun sözlərinə görə, icazəsiz keçiriləcək aksiyada "Azadlıq" bloku üzvləri tərəfindən polis əməkdaşlarına qarşı müqavimət, zorakılıq göstərilməyəcək.
Qeyd edək ki, daxili işlər naziri Ramil Usubov bu aksiya ilə bağlı bəyan edib ki, razılaşdırılmamış aksiyaların qarşısı alınacaq və heç kim icra orqanlarının məqsədəuyğun bilmədiyi yerlərdə yürüş, mitinq keçirə bilməz.
