43 saylı Sumqayıt üçüncü seçki dairəsi üzrə 10 nəfər namizəd Sumqayıt şəhərində etiraz mitinqi keçirililməsi barədə şəhər icra hakimiyyətinin başçısına müraciət edib. Bu barədə Trend ə namizədlərdən biri İntiqam Əliyev məlumat verib.
Sənədi həmin seçki dairəsindən deputatlığa namizədlər Mətləb Mütəllimli, İntiqam Əliyev, Elman Salayev, Yusif Sevdimaliyev, İslam Əliyev, Kəmaləddin Rəhimov və başqaları imzalayıblar. Xəbərdarlıq məktubunda bildirilir ki, həmin dairədə baş verən seçki saxtakarlıqlarına, icra hakimiyyəti strukturlarının seçki prosesinə müdaxiləsinə, pozuntularla bağlı verilən şikayətlərin obyektiv və vaxtında araşdırılmamasına etiraz olaraq deputatlığa namizədlər mitinq keçirtmək qərarına gəliblər. Mitinqin noyabrın 27-də saat 15.00-dan 17.00-dək keçirilməsi nəzərdə tutulub. Toplantı üçün 3 yer - Səməd Vurğun adına Mədəniyyət Evinin, "Qarabağ" kinoteatrının və "Kimyaçılar" Mədəniyyət Sarayının qarşısı təklif olunub. Mitinqdə "Azad, ədalətli seçki", "Yeni parlament seçkiləri keçirilsin", "Saxtakarlar məsuliyyətə cəlb olunsun" və s. Şüarlar səsləndiriləcək.
