"Bizim Azərbaycan" bloku Müsavat Partiyasının başqanı İsa Qəmbəri sədrlikdən uzaqlaşdırıb". Bu barədə Trend ə adıçəkilən bloka daxil olan Türk Millətçi Partiyasının (TMP) sədri Vüqar Bəyturan bildirib.
Qeyd edək ki, "Bizim Azərbaycan" blokuna daxil olan bir qrup partiya dekabrın 2-də Müsavat Partiyasının qərargahında toplantı keçirərək İsa Qəmbərin liderliyini qəbul edib. Bloka daxil olan 10-na yaxın partiya isə dekabrın 4-də TMP-nin qərargahında iclas keçirərək İsa Qəmbəri blokun sədrliyindən uzaqlaşdırıb.
V.Bəyturan onu da bildirib ki, İsa Qəmbərin ətrafında olan partiyalar "Bizim Azərbaycan" blokunun adından danışa bilməz. Çünki çoxluq onların tərəfindədir: "Blokdan bir neçə partiya İsa Qəmbəri dəstəkləyir. 11 partiya isə bizim tərəfimizdədir". TMP sədri onu da vurğulayıb ki, bloka sədrliyin rotasiya üsulu ilə həyata keçiriləcəyi barədə qərar qəbul ediblər: "Dekabrda Xalq Azadlıq Partiyasının sədri Valeh Mirzəyev, yanvarda isə mən bloka sədrlik edəcəm".
TMP sədri onu da qeyd edib ki, bloka daxil olan 11 partiya birgə əməkdaşlıqla bağlı memorandum imzalayıb.