"Bakı Dövlət Universitetindən (BDU) xaric edilən tələbə Turan Əliyev yenidən universitetə bərpa oluna bilməz". Bu barədə Trend ə BDU-nun mətbuat xidmətinin rəhbəri Qafar Çaxmaqlı bildirib.
Qeyd edək ki, Azərbaycan Xalq Cəbhəsi (islahatçılar) Partiyasının fəal gənclərindən olan T.Əliyev noyabrın 25-də təhsil aldığı BDU-dan xaric edilib. Müxalifətçilər bu hadisəni siyasi motivlə əlaqələndiriblər. T.Əliyevin universitetə bərpası ilə bağlı iki gündür ki, AXCP-nin Gənclər Təşkilatının bir neçə üzvü "Yeni Fikir" Gənclər hərəkatının ofisində aclıq aksiyası keçirirlər.
Q.Çaxmaqlı onu da bildirib ki, hər il dərs davamiyyətini və nizam-intizamı pozduğuna görə onlarla tələb universitetdən xaric edilir: "2004-cü ildə 84, 2005-ci ildə isə 70-ə yaxın tələbə bu səbəblərdən BDU-dan xaric edilib. Turan Əliyev də bu sıradadır. Onun universitetdən xaric edilməsində heç bir siyasi motiv yoxdur".
BDU-nun rəsmisi onu da qeyd edib ki, T.Əliyev Yeni Azərbaycan Partiyasının üzvü olub. Bir müddət isə partiyanın orqanı olan "Yeni Azərbaycan" qəzetində müxbir işləyib: "Belə çıxır ki, YAP onun universitetə bərpası üçün rəhbərliyə təzyiqlər göstərməlidir?".
Q.Çaxmaqlı qeyd edib ki, müxalifət tərəfindən bu məsələ ilə bağlı ajiotaj yaranmasına baxmayaraq T.Əliyev BDU-ya qətiyyən bərpa edilə bilməz: "Qaydaya görə xaric edilən tələbə bir il müddətində istehsalatda özünü doğruldub, müsbət xasiyyətnamə ilə bərpası üçün universitetə müraciət etməlidir. Təzyiqlər vasitəsilə heç bir qüvvə rektorun imzaladığı əmri ləğv edə bilməz".