Gürcüstan 3-5 mlrd. kubmetrə qədər təbii qaz qəbul etmək üçün texniki imkanlara malikdir. Bu barədə Trend xəbər verir. Bu gün hökümət toplantısından sonrakı birifinqdə Gürcüstanın energetika naziri Nika Gilauri bildirib ki, ən əsası - qiymətdir və tədarükün həcmi də bundan asılıdır. O qeyd edib ki, indi Azərbaycan və İranla qiymət və həcmlər haqqında danışıqlar aparılır.
"Bu proses yaxın gələcəkdə başa çatacaq", - deyə nazir vurğulayıb. Gilauri bildirib ki, birinci mərhələdə Gürcüstan "Şahdəniz" yatağından 300 milyon kubmetr qaz alacaq.
"Bu həcmdə qazın nəqli artıq dekabr ayında başlanacaq", - deyə o bildirib. İran qazına gəlincə isə, Tehranla danışıqların birinci mərhələsi oktyabrın 22-də baş tutub. Gürcüstana 50 meqavatt elektrik enerjisi tədarükü haqqında saziş əldə olunub və bu, yayda barterlə qaytarılacaq.