Azərbaycan, Bakı / Trend müxbir İ.Əlizadə/ Azərbaycan Demokrat Partiyasının (ADP) qurultaya hazırlıq üzrə Təşkilat Komitəsinin sədri Sərdar Cəlaloğlunun rəhbərlik etdiyi təşkilatın "Azadlıq" blokundan çıxarılmasından sonra bu partiyanın qərargahında müfəqqəti sığınacaq tapmış AXCP oradan çıxarılmayacaq.
Sərdar Cəlaloğlu qeyd edib ki, qərargahla bağlı AXCP ilə heç bir problemləri yoxdur: "Onlar istədikləri qədər bizim qərargahda qala bilərlər. Nəinki bu partiya, digər partiyalar da burda yerləşə bilər. Bu, bizi qətiyyən narahat etmir".
"Azadlıq" blokunun Sədrlər Şurasının martın 6-da qəbul etdiyi qərarın siyasətdənkənar münasibətlərə heç bir dəxli olmadığını vurğulayan S.Cəlaloğlunun sözlərinə görə, dünən axşamüstü qərargaha gələndə AXCP sədri Əli Kərimlinin maşınını binanın qarşısında görüb. "Azadlıq" bolkunun təsisçilərindən olan Vətəndaş və İnkişaf Partiyasının sədri Əli Əliyev də bu gün ABŞ səfirliyinin nümayəndəsi ilə görüşünü ADP-nin qərargahında keçirəcək: "Onlar istədikləri qədər ADP qərargahında qalıb fəaliyyətlərini davam etdirə bilərlər".
AXCP sədrinin müavini Həsən Kərimov bildirib ki, ADP "Azadlıq" blokundan kənarlaşdırılsa da, partiyalar arasında heç bir konflikt yoxdur: "Münasibətlər normaldır. Amma ev yiyəsi onlardır, nə vaxt "çıx" desələr, çıxmağa hazırıq. Hələlik əvvəlki qaydada ADP qərargahında fəaliyyətimizi davam etdiririk".
H.Kərimov AXCP-nin qərargahla təmin olunması məsələsi ilə əlaqədar onu da deyib ki, Dövlət Əmlakının İdarə Edilməsi üzrə Dövlət Komitəsinə məktubla müraciət etmələrinə baxmayaraq onların müraciətinə nə "hə", nə də "yox" cavabı verilir: "Bu məsələnin həllində komitə rəhbərliyinin tərəddüd keçirdiyi hiss olunur, belə görünür ki, AXCP-nin qərargah məsələsi Dövlət Əmlakının İdarə Edilməsi üzrə Dövlət Komitəsindən asılı deyil. Qurum yuxarı instansiyanın göstərişini gözləyir".
Xatırladaq ki, ötən ilin noyabrında bir neçə qurum, o cümlədən AXCP Xaqani küçəsi, 33 ünvanından çıxarılıb. Bundan sonra AXCP müvəqqəti olaraq ADP-nin qərargahında məskunlaşıb.
"Azadlıq" blokunun Sədrlər Şurası bu il martın 6-da Sərdar Cəlaloğlunun rəhbərlik etdiyi ADP-nin blokdan çıxarılması barədə qərar qəbul edib.
