Azərbaycan, Bakı / Trend müxbir İ.Əlizadə/ Martın 9-da Azərbaycan Xalq Cəbhəsi Partiyasının (AXCP) müvəqqəti qərargahında partiyanın sədri Əli Kərimli İsveç Krallığının Azərbaycan, Gürcüstan, Ermənistan üzrə səfiri Hans Gunnar Adene ilə görüşüb.
AXCP mətbuat xidmətindən verilən məlumata görə, görüşdə Azərbaycan-İsveç münasibətləri müzakirə edilib. AXCP sədri partiyanın keçmişi, mübarizə tarixi, partiyanın təmsil olunduğu "Azadlıq" blokunun fəaliyyəti ilə bağlı məlumat verib. Eyni zamanda görüşdə bütövlükdə Azərbaycanın Avropa strukturları ilə münasibətləri, bu strukturlar qarşısında Azərbaycanın götürdüyü öhdəliklər, ölkədə demokratik inkişafın perspektivləri müzakirə edilib.
Qeyd edək ki, müxalifəti təmsil edən AXCP hazırda "Azadlıq" siyasi blokunun üzvü və həmtəsisçisidir. Partiyanın qurucusu və 2000-ci ilə qədər sədri Azərbaycanın eks-prezidenti mərhum Əbülfəz Elçibəy olub. 2000-ci ildən indiyədək AXCP-yə keçmiş dövlət katibi, sabiq deputat Əli Kərimli sədrlik edir.
