Azərbaycan, Bakı / Trend , müxbir İ.Əlizadə/ Hesablama Palatası 2006-cı ildə 52 məsələyə baxıb. Bu barədə çərşənbə axşamı Bakıda Hesablama Palatasının nümayəndəsi Abbas Allahverdiyev məlumat verib.
Allahverdiyev bildirib ki, Hesablama Palatasının 2006-cı ildəki fəaliyyəti Palatanın iclasında təsdiq olunmuş İş Planına əsasən həyata keçirilib.
2006-cı ildə Hesablama Palatasının 33 iclası olub və bu iclaslarda 52 məsələyə, o cümlədən 14 halda həyata keçirilən nəzarət tədbirlərinin nəticələrinə baxılıb.
"Hesabat ilində Hesablama Palatasına 29 müraciət və şikayət ərizəsi daxil olub və müvafiq qaydada onlara baxılıb" - deyə o qeyd edib.
Milli Məclisin bu gün keçiriləcək iclasında Hesablama Palatasının 2006-cı ilin yekunlarına dair hesabatı müzakirə olunacaq. Palatanın sədri Namiq Nəsurullayev səhhəti ilə əlaqədar istefa ərizəsi yazdığına görə, quruma yeni sədr seçiləcək. Bu vəzifəni maliyyə nazirinin müavini Heydər Əsədovun tutacağı gözlənilir.