Azərbaycan, Bakı / Trend müxbir E.Hüseynli/ Yeni Azərbaycan Partiyasının (YAP) sədr müavini, icra katibi Əli Əhmədov cümə günü bəyan edib ki, 2008-ci il prezident seçkilərində partiyanın namizədi, Azərbaycan prezidenti İlham Əliyevin qələbə çalacağına heç kimdə şübhə yoxdur. Əhmədov Trend ə eksklüziv açıqlamasında bunu onunla izah edib ki, İlham Əliyev 2003-cü ildə prezident seçiləndən sonra Azərbaycanın inkişaf tempi əhəmiyyətli dərəcədə yüksəlib və dünya birliyində mövqeyi möhkəmlənib.
YAP sədri müavininin sözlərinə görə, Azərbaycanın indiki siyasi reallığı 2008-ci il prezident seçkilərində İlham Əliyevin rəqiblərinin olacağını da şübhə altına alır. "Biz seçkilərdə partiyanın namizədinin mütləq şəkildə uğur qazanacağına əminik" - deyə Əhmədov bildirib.
Onun sözlərinə görə, ilyarım qalmasına baxmayaraq, YAP prezident seçkiləri kampaniyasına start verib.