Azərbaycan, Bakı, 21 yanvar/ Trend , müxbir C.Babayeva/ Keçmiş prezidentliyə namizəd Fazil Əliyevin həmtəsisçi olduğu Gürcüstan azərbaycanlılarının müxalifət partiyası bu ölkədə yaşayan erməniləri öz sıralarına qəbul etməyə hazıdır. Bu barədə Trend -ə bazar ertəsi Fazil Əliyev Tbilisidən telefonla məlumat verib.
"Partiyada milli mənsubiyyətindən asılı olmayaraq, hamı təmsil olunacaq", - Əliyev bildirib.
Əliyevin Gürcüstan prezidentliyinə namizədliyi Gürcüstan Azərbaycanlıları Milli Assambleyası (GAMA) və Gürcüstan Azərbaycanlılarının Beynəlxalq Şurası (GABŞ) tərəfindən irəli sürülmüşdü. Dekabrda Fazil Əliyev prezident seçkilərində iştirakdan imtina edib. O, bu hərəkətini "Gürcüstanın dövlət strukturlarının təzyiqi" ilə izah edib. Nəticədə, Əliyev yeni müxalifət partiyasının yaradıldığını bildirib.
Partiyanın yaradılmasının əsas məqsədi Gürcüstanda mayda keçiriləcək parlament seçkilərində iştirak etməkdir. Gürcüstanın möcud Konstitusiyasına əsasən, parlament seçkiləri 2008-ci ilin payızında baş tutmalıydı. Lakin növbədənkənar prezident seçkiləri ilə eyni vaxtda keçirilən plebisist nəticəsində, parlament seçkiləri yazda baş tutacaq.
Növbəti həftə partiyanın qurultayı keçiriləcək. Partiya sədrinin seçiləcəyi və partiyanın adının təsdiq ediləcəyi qurultayın yekunlarına görə, Gürcüstan Ədliyyə Nazirliyinə rəsmi qeydiyyat üçün müraciət ediləcək.
Gürcüstan qanunlarına əsasən, siyasi partiyanın qeydiyyatı üçün ən azı1000 nəfərin bu partiyaya üzv olması lazımdır. Əliyev partiyaya onun kifayət qədər tərəfdarının daxil olacağına əmindir.
"Təkcə Gürcüstan azərbaycanlıları deyil, gürcülər də partiyaya daxil olmaq arzusunda olduqlarını bildirirlər", -Əliyev qeyd edib.