Azərbaycan, Bakı, 30 yanvar / Trend , müxbir K.Zərbalıyeva/ Dünyanın 45 azad media qurumunu birləşdirən Ümumdünya Mətbuat Azadlığı Komitəsi Azərbaycan prezidenti İlham Əliyevə müraciət edib.
Ümumdünya Mətbuat Azadlığı Komitəsinin İcraçı direktoru Markham Bençin imzaladığı müraciətdə deffamasiya ilə əlaqəli həbs olunmuş 5 jurnalistin əfv olunması alqışlanır. Həbsdə çoxsaylı jurnalistlərin olmasından təssüfləndiyini bildirən Benç "Xural" qəzetinin baş redaktoru Əvəz Zeynallı və qəzetin əməkdaşı Vüqar Ələkbərova qarşı olan məhkəmə qərarını pisləyib.
"Eynulla Fətullayev, Sakit Zahidov, Qənimət Zahidov və Müşviq Hüseynovun hələ də həbsdə qalması acınacaqlı haldır. Əzəv Zeynallı və Vüqar Ələkbərovun müvafiq olaraq 2 il və 1 il 6 ay müddətinə islah işlərinə cəlb edilmələri və bu müddətdə jurnalistlərin qazanclarından 20 faiz dövlət nəfinə tutulması barədə hökm azad mətbuata açıq təzyiq hesab oluna bilər" - deyə müraciətdə vurğulanır.
Müraciətdə qeyd olunur ki, jurnalistlərin məhkəmə tərəfindən ittiham olunduqları "cinayət" guya onların dərc etdikləri məqalədə dövlət məmuruna qarşı böhtan, şərəf və ləyaqəti ləkələyən, işgüzar nüfuza zərbə vuran materiallar kimi dəyərləndirilsə də, bu, dünyada demokratiyanın əsas atributlarından sayılan müstəqil mediaya və azad sözə qarşı basqıdır.
"Sizi öz səlahiyyətinizdən istifadə etməklə digər jurnalistləri də dərhal azadlığa buraxmağa çağırırıq" - deyə müraciətdə bildirilib.
