Azərbaycan, Bakı, 15fevral / Trend , müxbir K.Zərbalıyeva/ Korrupsiya halları Azərbaycanın regionlarında daha geniş yayılıb. Bu barədə cümə günü Korrupsiyaya Qarşı Mübarizə Fondunun keçirdiyi tədbirdə Fondun icraçı direktoru Vasif Mövsümov məlumat verib.
Mövsümov bildirib ki, regionlarda korrupsiyanın geniş yayılması yerlərdə məmurlar tərəfindən qanunların icrasına laqeyidlik, əhali tərəfindən yerli dövlət idarələrinə və məhkəmələrə olan inamsızlıq, ictimaiyyətin və yerli məmurların hüquqi maarifləndirilməsinin aşagı səviyyədə olması və vətəndaş cəmiyyətinin zəifliyidir.
Mövsümov bu səbəbdən də regionlarda korrupsiyaya qarşı mübarizə ilə bağlı yeni layihənin icrasına başladıqlarını deyib.
Fondun "Korrupsiyaya qarşı mübarizə ilə bağlı maarifləndirmə və virtual məsləhət mərkəzi" layihəsi Korrupsiyaya Qarşı Mübarizə üzrə Komissiyanın müsabiqə proqramında qalib müəyyən edilib.
Bir il müddətində 12 regionda həyata keçirilməsi nəzərdə tutulan layihənin məqsədi "Şəffaflığın artırılması və Korrupsiyaya Qarşı Mübarizə üzrə Milli Strategiya" barəsində ictimaiyyəti məlumatlandırmaq, vətəndaşların korrupsiya ilə mübarizədə fəallığını artırmaqdır.
Fondun icraçı direktoru korrupsiyanın qarşısının alınması üçün bir neçə təkliflə çıxış edib.
O bildirib ki, məmurların dövlət vəsaitinə sərəncam vermək hüququ əllərindən alınmalı, korrupsiya əməllərinə görə məsuliyyət gücləndirilməli, məmurlar üzərində dövlət nəzarəti artırılmalı, qanunvericiliyin antikorrupsiyon ekspertizası aparılmalı, korrupsiya cinayətləri barədə məlumat verən şəxslərin dövlət tərəfindən qorunması həyata keçirilməlidir.
Ötən il baş prokuror yanında Korrupsiyaya Qarşı Mübarizə İdarəsi tərəfindən vəzifədən sui-istifadə, vəzifə səlahiyyətlərini aşma, rüşvət alma, qulluq mövqeyindən istifadə etməklə dövlət əmlakını talama və digər faktlar üzrə icraatda olan 79 cinayət işindən 69 nəfər barəsində 41 cinayət işi üzrə ibtidai araşdırmalar yekunlaşdırılaraq, baxılması üçün məhkəmələhə göndərilib.
Müəlliflə əlaqə saxlamaq üçün elektron ünvan - [email protected]
