Azərbaycan, Bakı, 14 aprel/ Trend , müxbir İ.Əlizadə/ Azərbaycanın müxalifətyönlü "Gündəlik Azərbaycan" və "Realnıy Azerbaydjan" qəzetlərinin baş redaktoru Eynulla Fətullayev cəza çəkdiyi həbsxananın cərimə təcridxanasına (karsa) salınıb. "Məhbusun cərimə təcridxanasına salınması daxili nizam-intizam qaydalarını pozması ilə bağlıdır", - deyə bazar ertəsi Trend a açıqlamasında Azərbaycan Ədliyyə Nazirliyinin Pentensiar Xidmətinin ictimaiyyətlə əlaqələr mərkəzindən bildirilib.
Məhbusun atası Emin Fətullayev isə bildirib ki, baş redaktor aprelin doqquzunda daxili nazim-intizam qaydalarını pozmaqda ittiham olunaraq 10 gün müddətinə cərimə təcridxanasına salınıb.
Fətullayev Cinayət Məcələsinin terrorçuluqla hədələmə (214.1-ci), qulluq möveyindən istifadə etməklə milli, irqi, sosial və ya dini düşmənçiliyin salınması (283.2.2-ci) və vergidən yayınma (213.2.2) maddələri ilə təqsirli bilinərək, məhkəmənin hökmü ilə 8 il 6 ay azadlıqdan məhrum edilib. 12 saylı Cəzaçəkmə Müəssisəsində saxlanılan Fətullayev martın 26-dan aclıq aksiyasına başlamışdı. O, həbsdə olan jurnalistlərin azadlığa buraxılmasını, özünün işinə yenidən baxılmasını, Avropa Şurası və ATƏT-in siyasi məhbus məsələsində konkret müdafiə mexanizmləri ortaya qoymasını tələb edirdi. Fətullayevə dəstək məqsədi ilə martın 27-də jurnalistlər, siyasi partiya təmsilçiləri və QHT nümayəndələri də aclıq aksiyasına başlamışdılar. Fətullayev və ona dəstək verənlər ATƏT-in mətbuat azadlığı üzrə xüsusi nümayəndəsi Mikloş Haraşti ilə görüşdən sonra aprelin 8-də aclıq aksiyasını dayandırıblar.
Azərbaycanda 3 jurnalist həbsdədir.
Məqalə müəllifi ilə əlaqə ünvanı: [email protected]