Azərbaycan, Bakı, 16 may / Trend , müxbir R.Ergün/ Azərbaycanın futbol üzrə yığma komandasının almaniyalı baş məşqçisi Berti Foqts köməkçilərinin adlarını açıqlayıb. Bu barədə cümə günü Trend a Azərbaycan Futbol Federasiyaları Assosasiyasının (AFFA) mətbuat xidməti məlumat verib.
Foqtsun altı köməkçisindən üçü azərbaycanlı, üçü almaniyalı mütəxəssislərdir. Baş məşqçinin köməkçiləri kimi Elxan Abdullayevlə Yurqen Qede təsdiqlənib. Qapıçılarla məşqçilər kimi Faiq Əzizovla Uli Ştayn işləyəcəklər. Yığma komandanın seleksiyaçı-məşqçisi Nazim Süleymanov, fizioterapevt isə, Frenki Brennerdir.
Foqts Azərbaycan yığma komandasının baş məşqçisi vəzifəsinə bu ilin aprel ayının əvvəllərində təyin olunub. Ondan əvvəl komandaya makedoniyalı Qyoko Hacıyevski rəhbərlik edib.
Almaniyalı baş məşqçiyə kömək edəcək azərbaycanlı məşqçilər əvvəllər də yığma komandada fəaliyyət göstəriblər.
Bakıya dünən qayıdan Foqts Almaniyaya özünə köməkçilər seçməyə getmişdi.
Müəlliflə əlaqə saxlamaq üçün elektron ünvan - [email protected]